Ich Jacob der O^ela^er mein hausfraw und all unser erben und nachomen wir verjehen offenbar mit dem brief allen la^ewten, daz der erber Weyngos von Reychersperg sein hausfraw und all ir erben habent alleu jar ja^erleich segs schilling wienner pfenning ewigs geltz und alleu jar ze weynachten ein weysa^et daz zwelff wienner wol wert sey auf unserm haus und grunt daz gelegen ist datz Obernperg zwischen Andres dez Waysen haus und Go^ergen dems (sic) Schalchaimer alzo mit der beschaiden, daz man in di obverschriben segs schilling pfenning ewigs geltz sol dienen und raychen alleu jar alzo hoff zyns und auch der hoff march recht ist an alleu wider red vor allem hoff zyns vor aus, und daz obverschriben weysa^et ze den weynacht, ez sey gepawt oder ungepaut. wa^er aber ob in daz von uns oder unsern erben versezzen wurd, so habent si gewalt dar umb zue ze speren alzo der hofmarch recht ist. wa^er aber ob daz haus ab verprunn oder oed lag daz Got nicht engeb und daz in ir obverschribena^er ewiger gelt ze den ta^egen alzo der hoffmarch recht ist nicht geviel ze sampt dem weysa^et und daz wir den grunt nicht paun wolten oder mo^echten, so habent si gewalt sich dez gruntz ze underwinden und da mit ze varn alzo der hoffmarch recht ist, und sol si da niemant inn engen noch irren weder mit recht noch an recht geistleichem noch werltleichem in dhainer weis. Auch mu^egen wir allen unsern frum da mit schaffen oder tu^en mit versetzzen oder mit verchauffen wie uns verlust, unverzigen iers obverschriben ewigen geltz und auch dez weysa^etz. und daz in und uns und wer den brief mit irem willen inn hat und den fu^er pringt daz furbas ewichleich sta^et und unzerbrochen beleib, geb wir in den offen brief mit dez erbern vesten ritter hern Thomans dez Appfeltala^er ze den zeiten pflegern ze Obernperg und mit Fridreichs dez Reuter ze den zeiten richter da selbs anhangunden insigeln besigelt di die durch unser fleizzigen pet willen an den brief gehangen habent der herschafft und in an allen schaden, dar under wir uns und unser erben und all unser nachomen ewichleich verpinten mit unsern treun, alz daz sta^et ze haben daz oben geschriben stet. Daz ist geschehen in ehafftem tayding in offner schrann vor allen purgarn nach Christi gepurd dreutzehen hundert jar dar nach in dem sybentzgistem jar.

Source Fulltext: OÖUB 8 (Wien 1883), S. 501f., Nr. 507