Ich Pertiger der Vidorffer und mein erben vergehen, daz ich recht und redleichen gelten schol meiner lieben wirtin vrawen Elzpeten fu^er ier rechteu margengab hundert phunt phenning wienner munizz, da ich ier recht und redleichen fu^er gesetzzt han meinen hof ze Vidorf mit allen den ern rechten und nutzzen und dar zu geho^ert also beschaidenleichen, daz mein wiertin vraw Elzpet schol mit sampt mier den ee genanten hof und alls daz darczu^e geho^ert schol ynn haben nutzzen und nyessen mit allen den rechten alz vo^er geschriben stet cze unser peder tegen. Ez wer dan als vil daz wier erben mit einander gebunnen, so schol der vorgenant hof nach unser peder teg gevallen auf unser peder erben. wer aver daz wier an erben abgiengen, so schol der hof und waz darczu gehort nach meiner lieben wiertin tad herwider erben auf mein nast vreunt. Ez schul auch mein hausvraw Elzpeth nach meinem tad den offt genanten hof und als daz von alter darczu^e geho^ert nutzzen und nyessen in allen den rechten alz saczz und margengab recht ist und gewanhait in dem lant cze O^esterreich. Nem mein vorgenanteu hausvraw daran schaden mit recht mit welicherlay invell daz wer den si ungeswarn gesprechen mag pei iern trewn, den schol ich ier ablegen und widerchern an chlag und an furbot und an all ier mue, und si mich auch darumb na^etten und phenten mit meinem gu^etleichem willen auf wasser und auf lant in steten und in merchten, und schol ier dez helfen und mich darumb no^etten wer dez hertzogen marschalich ist in O^esterreich. Si schol ez auch haben auf mir und auf aller meiner hab di ich han oder die ich noch gewinn in dem lant ze Osterreich oder wo ich deu han. Und daz ier di red und di wandlung und der satz steit und unczebrochen beleib, daruber gib ich vorgenanter Pernger der Vidorffer meiner lieben hausvraw und meinem liewen slafgesellen vraw Elzpeten den prieff versigilt czu einem offen urchu^ent und czu einem warn czeug der warhait bestetigt mit meinem anhangunden insygill; und dez sint czeug durich meiner vleiszigen pet willen der erber ritter her O^ethacher der Wolfstayn und Ulreich der Reykkerstorffer Chunrat der Schermer mit iren anhangunden ynsigil. Der brief ist kewen nach Christes gepurd dreutzehen hundert jar darnach in dem subentzgistem jar an der heyligen dreier chunig tag nach weinachten.

Source Fulltext: OÖUB 8 (Wien 1883), S. 446f., Nr. 452