Ich Wernhart der Tewrbanger und ich Katrei sein hausfraw und ich Hans und ich Stephan ier baider su^en und all unser erben und nacho^emen wier verjehen, daz wier ze kauffen haben gebn Petrein den Harucher und allen sein eriben all di gu^eter di hernach an dem brief geschriben stent, zdem ersten unser gesäzz ze Gna^ewzznawe daz lehen ist von unserm gna^edigen herren dem bischof von Pazzawe und ein hub ze Ru^ekkasperig di freis aigen ist, und ein hub ze Weigleinstorf di lehen ist von dem Valchenstainer, und ein lehen an dem Staina^eh daz auch rechtz aigen ist, und in der Cell vier hofstet di lehen sind von unsern gna^edigen herren von den von Rosenberg, und fu^enf hofstet auch gelegen in der Cel/e und geho^ernt in daz vorgenante gesa^ezz ze Gna^ewzzenaw und sind auch rechtz aigen . . . Wir sein auch der egenanten guter aller ier rehter gewern und ir furstant fu^er all ansprach an aller der stat da in sein not und durft geschicht also kauffs und dez landz recht ist ob der Ens . . . Wir haben in auch di vorgenanten gu^eter all besta^et, daz vrey fu^er freis aigen, daz lehen mit der rechten lehenherren hant di oben an dem brief geschriben stent. Und daz in der kauff und di red also vestt sta^et und unverkert beleib, daru^eber so geben wir in den prief versigelt ich egenanter Wernhart der Teurbanger und ich Hans sein sun mit unser baider anhangundem insigell, und ze einer pezzern sicherhait und zeugnu^ezz under unser liben freunt hern Wernharcz von Aisterzhaim und Wernharcz dez Gna^ewzzen und Sigharcz dez Gna^ewzzen anhangunden insigellen, darunder ich mich egenantew Katrei di Tewrbangerin und ich vorgenanter Stephan der Tewrbanger ier sun und all unser eriben haben verpu^enden mit unsern trewen, alz daz stät ze haben daz vor an dem prief geschriben stet wann wir niht aigner insigelln enhaben. Der prief ist geben nach Kristez gepu^erd u^eber drewzehen hundert jar darnach in dem sibenczkistem jar dez phincztags nach sand Alexy tag.

Source Fulltext: OÖUB 8 (Wien 1883), S. 479f., Nr. 484