Ich Chunrat der Volchrat und mein hausfraw Margaret und all unser erben wier verjehen, daz wier haben ze chauffen geben unsern czehent cze Puesbig unserm lieben frewnt Fridreich dem Puesinger und Lippen von der Stiegen ier payder hausfrawn und ieren erben um sex und czwaincz phunt gueter wiener phennig der wier gancz und gar gericht und gewert sein, und der vo^ergenant czehent ist gelegen in Swanser pfar und der unser rechtcz lehen ist von unsern genedigen herren den herczogen von O^esterreich, und geben in auch den selben czehent mit nu^eczen und rechten und eren di darczue ho^erent gesuecht und ungesuecht, und sein auch dezselben czehents ier gewer an aller stat wo in dez no^et geschicht mit dez lants recht ob der Ens. wer aver daz in an der gewerschaft icht abgieng, waz schaden si des neinen den schu^ellen si haben auff unsern trewn und auff aller unser hab. wer aver daz wier den czehent wollen verseczen oder verchawfen, so schulle wier in die nechsten erben an no^eten, wolten si dan darauff nicht leichent oder chaufen so scho^el wier unsern frum da mit schaffen wo wier aller pest mu^egen, da schullen si u^ens nindert an ierren. Daz die red stet und unverchert weleib daru^eber gib ich vorgenanter Chunrat Volchrat den prieff versigelt mit meinem anhanunten (sic) insigel. Und ze einem pezzern u^erchund mit meines lieben swager Marcharts dez Hebichler anhangunden insigel. Geben nach Christes gepu^erd drew czen hundert jar darnach in dem sibenczisten jar an sand Vyten tag.

Source Fulltext: OÖUB 8 (Wien 1883), S. 472f., Nr. 476