Wir Johans von Gotes genaden pfallentzgraf bey Rein und hertzog in Bayern etc. bechennen offenleichen mit dem brief umb die bunttnüzz, di unser lieber herr und vater her Stephan der elter und unser lieb bru^eder Stephan und Fridrich von denselben Gotes genaden pfallentzgrafen bei Rein und hertzogen in Bayern getan habent zu dem edlen und wolgeborn mann graf Ulreichen von Schawnberg nach der brief sag di si an einander daruber gegeben habend; also verbinden wir uns auch zu im zu helfen und zu raten mit allem unserm vermügen in aller der mazz und weis alz diselben brief mit allen iren bunden und artikellen von wortt zu wörtt begriffen und geschriben sind, wan daz alles mit unserm gütleichen willen und wört beschechen ist. Mit urchund ditz briefs den wir im geben mit unserm insigel versigeltem. Geben zu Lantzhu^et an freitag vor sand Marteins tag anno domini M°.CCC°. (millesimo trecentesimo) septuagesimo.

Source Fulltext: OÖUB 8 (Wien 1883), S. 494, Nr. 499