Ich Jans von Trawn hauptman ze der Vreyenstat bechenn offennlich mit dem brief fu^er mich und fu^er all mein erben diener und helfer, daz ich mein diener und helfer freuntlich genuglich gar und gaentzlich geriht sein mit dem erwirdigen herren hern Pilgreim ertzpischof ze Salzburg legaten des stu^els ze Rom und mit seim gotshaus umb alle stözze chriege vo^erdung zu^espru^ech und schaden die wir hincz im und seinem gotshaus von der phleg wegen ze Tyttmaning und von allen andern sachen wie die genant sind gehabt haben uncz auf den heutigen tag also, daz wir hinfu^er hincz im hincz seinen gotshaus und hincz seinen nahchomen noch hincz allen den irn dehain ansprach noch vordrung niht haben sullen noch mu^egen noch in dehainen schaden zu^ecziehen in dehainem weg wir selber oder ander yeman von unsern wegen. daz loben wir mit unsern trewen an aydes stat steet ze haben an allez geverd. und daru^eber ze urchu^end gib ich vo^ergenanter Jans von Trawn fu^er mich mein erben dyener und helfer den offen brief versigelten mit meim anhangend insigl, der gebn ist ze Friesach do nach Christs gepurd ergangen waren dreuczehen hundert jar darnach in dem sibenczigistem jar an sand Lienhards abent.

Source Fulltext: OÖUB 8 (Wien 1883), S. 493, Nr. 498