ICH Ulrich der Wasner vergich und tu^en kundt mit dem brief, das ich mich mit meinem leib und meinem gut verpunten hab hindter den edl wolgeboren mein liebn herrn graf Ulrichen von Schawnberg und hindter all sein eriben und nachkomen also, das ich mein leib und mein gutt von in nymer entfpromden (sic) noch entfuren sol haimlich noch offennlich weder mit der vest ze Wasen noch mit dem allen das ich hab, besucht und unbesucht oder wie das genant ist. Wa^er aber das ich das yndertt uberfu^er, so hatt sich mein leib und mein gutt verfallen in des obgenanten meins herrn seiner erben und nachkomen gewallt und sol mich wider sy nyemant behalden noch beschirmen weder weltlich noch geistlich gericht wie das yemant erdencken oder erfinden mag. Mit urkund des briefs den ich daru^eber gib versiglt mit meinem insigl und mit meins lieben vatters Fridrich des Wasner insigl. Auch vergich ich vorgenanter Fridrich der Wasner, ob das wa^er das mein sun Ulrich der Wasner das yndertt u^eberfu^er das vor an dem brief geschriben stett, so sol ich demselben meinem sun enterben von aller der hab der er von mir wartund ist, und sol ich dem obgenanten meinem herrn graf Ulrichn von Schawnberg und sein eriben damit wartten trewlich an alles geva^er es sey vest oder urbar. Und zw ainer gezeugnu^es der vorgeschriben sach haben wir baid obgenant Wasner gepetten den erbern vessten ritter herrn Jorigen Eytzinger Hansen den Kirichperiger und Hansen den Schiffer das sy irew insigl an den brief gehangen habent zw ainer gezewgnu^es der rechten warhaitt den vorgenanten drein an schaden. Der brief ist geben an eritag vor aller heiling tag do man zallt von Kristi gepu^erdtt tausent iijC. jar und darnach in dem lxx. jar.

Source Fulltext: OÖUB 8 (Wien 1883), S. 492f., Nr. 497