Ich Andre Sintzendorffer und ich Hannss und ich Leutold wir peed brüder Hainreich des Pernawer kinder seeligen mit sambt unser geshwistreten und dazu mit all unsern erben wie die genant sind gegenwürtig und chu^enfftig wir vergehen, daz wir ze kauffen haben geben zu einem rechten khauff nach landts recht ob der Ennss dem erbern mann Ulreichen dem Zehentner und seiner haussfrau und allen ihren erben die sy habent oder noch gewinnent unser gut daz Nider auf Vischleinsberg genant gelegen in Haller pfarr undt unser recht lehen gewesen ist von (dem) erbern herrn herrn Weykhardten von Polhaim, und haben ihn auch daz obgenant gut geben mit allen den ehren rechten und nüczen dy darzu gehörent auss unser nutz und gewehr in ir nutz und gwöhr mit herrn handt und mit aller stet umb ain gelt, des wir von ihn gantz und gar verricht und gewehrt sein an allen schaden mit der beschayden, daz wir obgenant noch unser erben keiner nach dem obgenanten gut kein ansprach nimmer mehr gehaben noch gewinnen schullen, und schullen auch wir obgenant mit sambt unsern erben des ottgenanten gu^ots und alles des daz darzu gehört des obgenanten Ulreichen und seiner erben recht gewehr und fu^orstandt seyn, und gierig ihn an der gewehrschafft icht ab, was sy dess schaden na^emen mit recht wie der schad genant wird daz er oder seiner erben ainer gesprechen möcht bey seinen trewen an ayd und ungesworn und an alles recht, denselben schaden zusambt dem haubtgu^et schull wir ihn ablegen und wider kehren. Daz dem obgenanten Ulreichen und allen seinen erben die sach und tayding also stet und unzerbrochen beleib von uns obgenanten und von all unsern erben, darüber geb wür ihn den offen brief versigelt mit meinem aigen anhangenden insigl; und ich Hannss und Leutold wir beed obgenant brüder mitsambt unsern geswistreten und all unsern erben verpinden uns mit unsern trewen unter unsers lieben ohaim Andres des Sintzendorfer anhangunden insigl, alles daz sta^et ze haben daz oben geschriben stet wan wir aigens insigl zu derselben zeit nicht gehabt haben, und zu einer bessern sicherheit und zeugnus mit der erbern Seybots des Sinzendorffer und Hansens des Hussendorffer anhangunden insigeln. Der brief ist geben do man zalt von Christi gepurth dreyzehen hundert jar darnach in dem ain und sibenzigisten jar des sontag vor mittervasten wan man singt Oculi mei semper.

Source Fulltext: OÖUB 8 (Wien 1883), S. 516f., Nr. 522