Ich Steffan der Chlosnär in den Stubenperg mein hausfraw und all unser erben verjechen, daz wir uns liepleich und freuntleich verricht und veraint haben mit unserm lieben genadigen herren graf Ullreich von Schaunberch und mit allen seinen erben umb all handlung und zuspruch dew wir zu im und zu allen seinen erben gehawt haben, daz wir noch all unser erben und nachchommen chainen zuspruch noch vodrung zu im und zu allen seinen erben niht mer haben sullen noch gebinnen noch anders niemant von unsern wegen weder an recht noch mit recht wie dew genant sint, ez seinn gaistleichew recht oder werltleichew recht von aller läuff wegen dew sich zwischen unser vergangen habent uncz auf den heutigen tag. Daruber zu ainer sicherheit geben wir in den brief versigelten mit unserm anhangoten (sic) insigel der sach zu ainer zeugnuzz, und stat zu haben waz an dem brief verschriben ist, und under dez vesten rytter herren Jo^ergen von Aheym insigel. Daz ist geschehen do man zalt von Christ gepurtt dreuczechten (sic) hundert jar und darnach in dem ain und sibenczigistem jar dez negsten pfintztag nach sand Ayten tag.

Source Fulltext: OÖUB 8 (Wien 1883), S. 511, Nr. 517