Wir Leupolt von Gottes gnaden herczog ze O^esterreich ze Steyr ze Kernden und ze Krain graf ze Tyrol etc. verjehen und tu^en chunt offenlich mit disem briefe, daz wir dem edeln unserm lieben öheim graf Ulreichen von Schawnberg und seinen erben gelten sullen und schuldig sein fu^emfczehen hundert phunt wienner phenning der wier in und sein erben unverczogenlich richten und weren sullen zu den weichnachten die schierist koment, und habent in darumb zu^o tro^ester und purgeln gesaczt und geben unser liebe getrewen Hansen den Trawner Otten den Zelkinger von Scho^enek und Reinharten den Wa^ehinger unsern hofmaister mit solicher beschaidenhait, ob wir den vorgenanten von Schawnberg oder sein erben des egenanten geltes nicht richten und werten auf das zil das vorgeschriben stet, swenne si danne dieselben unser purgeln oder ir na^echste erben ob si nicht weren manent und vordernt, so sol ir yeklicher zwen erber ritterma^ezzig knechte yeklichen selbandern mit zwain pha^erden des na^echsten tages darnach ze Wels in die statt in ain erber gasthaus senden und innlegen swa si in hinzaigen, und sullen die da inneliggen und laisten als innliggens und laistens recht ist, und da nymmer auskomen ez werd ee der vorgenant graf Ulreich von Schawnberg und sein erben der egenanten fumfczehen hundert phunt phenning gancz und gar gewert und gerichtt. Wa^er aber daz in die laistung verczogen und also nicht volfu^ert wurd, swas si danne der egenanten phenning nach dem obgenanten zil furbazz schaden nement wie der genant ist und den si gesprechen mugent iren siechten wortten an ayd und ander bewa^erung darumb ze gelauben, denselben schaden mitsampt dem hauptgu^ot sullen in die vorgenanten unser pu^ergeln ga^enczlich ablegen und widerkeren. Si sullent ouch hauptgu^ot und schaden haben auf in unverschaidenlich und auf allem iren gu^ot wa si das haben und wie das genant ist si sein lebentig oder to^ed. und wer disen gegenwurtigen brief mit des obgenanten graf Ulreichs von Schawnberg gu^oten willen innehat und die egenanten purgeln damit manet, dem sind si alles des gepunden ze gelten ze laisten und ze volfu^eren das vorgeschriben stet ze geleicher weise als im selber. und daruber geben wir obgenanter herczog Leupolt von O^esterreich disen brief versigelten mit unserm und der egenanten unsrer purgeln insigeln. Und wier die vorgenanten purgeln ich Hans von Trawn haubtmann ze der Freyenstat ich Ott von Zelking von Scho^enek und ich Reinhart Wa^ehinger hofmaister verjehen und bechennen, daz wier durch des obgenanten unsers lieben gena^edigen herren herczog Leupolts bet willen hinder dis purgelschafft willekleich gegangen sein und verhaizzen mit unsern trewen an all geva^er und widerred sta^et ze haben ze laisten und ze volfu^eren alles das hie vor an disem brief von unsern wegen geschriben stet, und haben daruber zu^e des vorgenanten unsers herren herczog Leupolts insigel die unsern haizzen henken an disen gegenwurtigen brief. Der geben ist ze Steyr an sand Matheus tag des heiligen zwelfbotten und ewangelisten nach Kristes gepurd drewczehen hundert jar darnach in dem ainen und sibenczigisten jare.

Source Fulltext: OÖUB 8 (Wien 1883), S. 543f., Nr. 548