ICH Ulreich von Liechtenstain ze den zeiten houbtman in Steyr vergich fu^er mich und fu^er alle mein erben, daz ich mit gunst und nach rat meins vaters hern Ru^edolfotten von Liehtenstain obristes kamrer in Steyr und marschalich in Kernden und meiner pru^eder Otten und Fridreichs von Liehtenslain und mit willen und gunst meins genedigen herren des hochgeborn fu^ersten herczog Albrechtes ze O^esterreich ze Steyr ze Kernden und ze Chrain graf ze Tirol etc. recht und redleich gesatzt han Chu^enraten und Fridreichen gebru^edern von Hohenberch und irn erben fu^er fu^emfhundert phunt wienner phenning der si mich gantz und gar gewert habent, meinen satz ze Lawchsse der mir von meinen gnedigen herren den hertzogen ze O^esterreich stet, sibenthalbhundert phunt wienner pfenning mit allen den nu^etzen ern und rechten als mein brief sagent die ich von denselben meinen herren den hertzogen daru^eber han also beschaidenlich, alle die weil ich oder die vorgenanten mein vater mein pru^oder oder unser erben den egenanten satz von den obgenanten Chu^onraten und Fridreichen von Hohenberch und von irn erben umb die vorgenanten fu^emfhundert phunt nicht lo^esen, so su^ellen si denselben satz in nutz und in gewer innehaben niezzen und nu^otzen ze gleicher weise als wir den selben innhaben und niezzen solten nach unser herren der hertzogen brief sag an allen abslag. Wir haben ouch vollen gewalt denselben satz von den egenanten Hohenbergern und von irn erben zelo^esen wenn wir mu^egen oder wellen mit fu^emfhundert phunden wienner pfenning, und su^elln ouch si uns derselben lo^esung stat tu^on und gehorsam sein, wenn wir si mit fu^emfhundert phunden wienner phenning ermanen an alle verziechnu^ezze und widerred. Wer aber daz unser herren die hertzogen den egenanten satz von in lo^esen wolten, den sullen si in zelo^esen geben umb sibenthalb hundert phunt wienner pfenning, der fu^emfhundert phunt den vorgenanten Hohenbergern und irn erben gevallen su^olln und denn die u^ebrigen anderthalbhundert pfunt su^elln mir und den vorgenanten meinem vater meinen pru^edern und unsern erben gevallen an allen chrieg. Wenne ouch das wer daz si den vorgenanten satz nicht lenger innehaben wolten, so mu^egen si in denn mit der egenanten unserr herren der hertzogen gunst und willen wol fu^erbas versetzen wem si wellent umb alsvil pfenning, als er in von mir stet und in den rechten so vor an dem brief verschriben ist. Und durich bezzer sicherhait willen setzen wir uns obgenanten ich Ulreich von Liehtenstain ich Ru^edolfott von Liehtenstain sein vater ich Ott und ich Fridreich von Liehtenstain ouch desselben hern Rudolfotten su^en und all unser erben unverschaidenlich u^eber den offtgenanten satz den vorgenanten Chu^onraten und Fridreichen von Hohenberch und irn erben ze rechten gewern und scherm fu^er alle ansprach als satzes recht ist und des lanndes recht ze O^esterreich. Wer aber daz in an demselben satz icht abgieng mit recht, was si dez schaden nement das sulln wir in alles ausrichten und widerchern. Und daru^eber so geben wir in den brief zu einem warn urchu^ende der sache versigilten mit unsern angehangen insigiln. Der brief ist geben ze Wienne an sand Michels abent nach Christes gebu^ert dreutzehenhundert jar in dem ayns und sibentzgistem jare.

Source Fulltext: OÖUB 8 (Wien 1883), S. 547f., Nr. 552