Wir Albrecht von Gots gnaden herczog ze Osterreich ze Steyr ze Kernden und ze Krain graf ze Tyrol etc. embieten unsern getrewn . . dem richter und dem rat ze Ens unser gnad und alls gut. Wir emphelhen ew und wellen gar ernstlich bei unsern hulden, daz ir von unsern wegen vast wendet und ouch understet, daz nyeman wer der sei mit seiner choufmanschaft her auz von Venedi uber den Pyern vare noch arbaitte denne di rechten strazze uber die Zeiregg, dann alain unser purger von Ens von Lyncz Gmunden und von der Freynstat, dieselben unser purger sullen und mugen mit irr hab und choufmanschaft varen alz das von alter herchomen ist. Und swo ir daruber chomet auf solich chaufmanschaft die man für Rastat und ander ungewonlich strazze uber den Pyeren fürte, daz ir die heftet und niderlegt und innehat zu unsern handen. Daran tut ir genczlich unsern willen. Geben ze Wienn an dem heiligen prehem tag, anno Lxx primo (millesimo trecentesimo septuagesimo primo).

Source Fulltext: OÖUB 8 (Wien 1883), S. 502f., Nr. 508