Ich Alber von Pu^echhaim obrister druchsaetz in O^esterreich und ich Haertneid von Losenstain wir vergehen offenleich mit dem brief umb alle die chrieg und sto^ezze die gewesen sint zwischen unsern ohaymen Hainreichen und Gundakchern gebru^edern von Dachsperkch an ainem tail und dem erbern heren Petrein zu den zeiten pharrer ze Waidhofen bei der Tay und schreiber hern Haidenreichs von Meissow^e zu den zeiten lantmarschalichs in O^esterreich an dem anderen tail, von derselben chirihen wegen von Waidhofen die weilent herrn Eberharten von Dachsperkch seligen ze phlegnu^ezze ingeantwu^ert ist und nach desselben hern Eberhartes tod die phlegnu^ezze an die obgenanten gebru^eder chomen ist, und darumbe si auf paidenttaillen mit gu^etleichem willen hinder uns gegangen sind also, was wier zwischen in daru^embe sprechen daz sullent unde weilent si gentzleich sta^et haben und dapei an allen chrieg beleiben, daz wir daru^eber gesprochen haben und sprechen ouch, waz nu^etz auf dem vicari noch ligent daz der egenant her Peter den vorgenanten gebru^eda^ern von Dachsperkch davon geben sol zehen phunt wienner phenning, und was dez u^ebrigen ist daz sol demselben heren Petrein und der chirihen gevallen; auch sprechen wier daz die vorgenanten Hainreich und Gundakcher von Dachsperkch fu^erbas dem egenanten heren Petrein und der vorgenanten seiner chirihen ze Waidhofen chainen u^eberlast noch beswarung tu^en sullen noch von dhainem der ieren geschehen sullen lazzen, sunder daz si desselben heren Petreins seiner chirihen und der gu^eter die dartzu^o geho^eret genaedig herren und beschiermer sein sullen. Und des ze u^erchund geben wier den brief besigilten mit unseren angehangen insigilen, der geben ist ze Wienne nach Christes geburd drewtzehen hundert jar darnach in dem ains und sibentzgisten jar an sand Agnesen tag.

Source Fulltext: OÖUB 8 (Wien 1883), S. 504f., Nr. 510