Wir Leupolt von Gotes gnaden herczog ze O^esterreich ze Steyr ze Kernden und ze Krain graf ze Tyrol etc. embieten unsern getrewn . . dem richter, . . dem rat und den purgern gemainlich ze Lyncz unser gnad und allez gu^et. Wizzet daz wier unsern halben tail der stewer, die ier ja^erlich geben sullt empholhen haben dem erbern und weisen unserm lieben getrewn Leupolten pharrer ze Paden ze geleicher weise als der hochgeborn furst unser lieber bru^oder herczog Albrecht seinen tail seinem hofmaister empholhen hat. Davon gepieten wir ew ernstlich und wellen ouch, daz ir von dem tag als der brief geben ist dem egenanten Leupolten mit den halben nuczen der egenanten stewer gehorsam und gewertig seit von unsern wegen und in denselben unsern halben tail furbazzer gebet und raichet und nyeman ander, und ouch mit ewern gebresten die ew anligend sind fur in chomet, wan wier mit im geschafft haben daz er ew die all¬czeit wende an unsrer statt. Und swes er ew seinen brief geit von derselben nucz wegen an unserm halben tail, das sagen wier ew ledig und lo^es. Wer aber daz ier icht anders daruber ta^etet und den egenanten unsern tail anderswohin raichtend denne davor geschriben stet, das wer genczlich wider uns und wolten ew swerlich darumb pezzern. Geben ze Wienn an freytag vor sand Johans tag ze sonnwenden anno Lxxmo primo (millesimo trecentesimo septuagesimo primo). Dominus dux.

Source Fulltext: OÖUB 8 (Wien 1883), S. 532, Nr. 537