Ich Ulrich Chramer purger zu Gmunden und mein hausfrau Agnes und all unser erben verjehen, das wir Ulreichen dem Mu^elner in der Ed und seiner hausfrau Annen und allen iren erwen recht und redleich haben gewen erbrecht auf der mu^el in der Ed do si aufgesessen sint alzo mit der peschaiden, das si uns alle jar davon dinen schu^ellen an unser vraun tag zder dinst zeit newer phening ze dinst sehczig und zwai hu^ener an sand Merteins tag alter phening sehczig ze stew^er und zden weinachten czehen phening ze weiset und zden ostern czehen phening für weyset und nichcz mer, und swan das ist daz si den dinst versiczent zdrein virczehen tagen an unserm willen und an unser gunst, so hat sich ir erbrecht auf der vorgenanten mu^el vervallen in unser gewalt das si chain recht darauf nicht hawent, und al di weil si den vorgeschriben dinst gewent so sullen wir nichz mer hincz in ze vodern hawen. Wer awer das si ir erbrecht mu^esten oder weiten verchauffen, so schu^ellen se es uns anpieten und schullen wir ins gelten als ander leut; wolten wir des nicht tu^en swo se dan iren frum da mit geschaffen megen ez sei mit verseczen odir mit verchauffen da schollen wir se nichz an saumen noch irren an gever. Wir sein auch des vorgeschriwen erbrechtz ir gewer wo in des not und du^orft geschicht alz erbrechcz recht ist. das in das alles stet und unverchert von uns peleib und daru^eber ze einem waren offenen Urkunde aller der vorgeschriwen sache gewen wir in den prief besigelten mit des erbern mann insigel Michel Amptmans zder zeit ze Gmunden, und zu einer pesseren sicherhait mit des erbern mans Johannis des Schreiber insigel purger ze Gmunden. Gegeben ist der prief nach Christes gepurd do man zalt dreiczehen hundert jar darnach in dem ains und subenczkistem jar des erhtagz noch sand Peter und sand Pauls tag.

Source Fulltext: OÖUB 8 (Wien 1883), S. 532f., Nr. 538