Ich Wolfganch der Ottsdorffer und ich Ma^euritz der Ottsdorffer sein pru^eder und mit sampt uns all unser erben wir verjehen, daz wir recht und redleich ze chau^effen haben geben dem erbern mann Ru^eegern von Humbretzried lantrichter ze Slierbach und allen seinen erben u^enser gesa^ezz daz gehaizzen ist der Weyerhof und ist gelegen in Weischircher pharr und der u^enser recht lehen ist gewesen von u^ensern gena^edigen herren den Losenstainern mit allen den ern rechten und nu^etzen die dar zu^e geho^erent alz ez u^enser vodern und auch wir von alter inn gehabt haben, umb ain gelt dez wir gar und gantz gericht und gewert sein ze rechter zeit. wir geantwurten in auch daz vorgenant gesa^ezz alles auz unser nu^etz und gewer in ir nutz und gewer also, daz wir noch chain u^enser erben fu^erbaz nimmer mer chain ansprach noch zu^oversicht dar auf schu^ellen noch mu^egen gehaben. Und daz in daz allez war und sta^et und unzerbrochen beleib, dar umb geben wir in den brief versigelt mit u^ensern anhangenten insigelen, und darzu^o zu^o ainer pezzern sicherhait und zeugnu^ezz mit hern Andres des Ha^eunspergers und mit Otakchers dez Sultzpekchen richter ze Chremsmu^enster und mit Weikchartz dez Pa^euren schaffer ze Pernstain anhangenten insigelen. Dar under verpint wir u^ens und all u^enser erben mit u^ensern trewen allez daz war und sta^et ze haben daz an dem brief geschriben stet. Der brief ist geben nach Christes gepu^erd dreutzehen hundert jar und darnach in dem zway und sibentzigisten jar an sand Veitz tag.

Source Fulltext: OÖUB 8 (Wien 1883), S. 595f., Nr. 593