Wir Stephan der ju^enger von Gotes genaden phallentzgraf bey Rein und hertzog in Beyern etc. bechennen offenlich mit dem brief, daz wir sein schuldig worden und gelten sullen dem edeln wolgeborn graf Ulreichen von Schaunberch und allen seinen erben zway hundert pfunt wienner pfenning di si uns berait gelihen habent, haben wir in bey unsern trewen versprochen daz wir in ledichleichen einantwurten su^ellen und wellen unsern ungelt ze Strazwalhen zwischen hye und sand Merteins tag der schirst chu^emt also, daz sy uns her zu^e tu^en und gewen su^ellen waz dann erfunden wirt daz billeich ist; mo^echt dez aber nicht gesein so su^ellen wir in auf di egenant zeit gelten und widergeben di vorgenanten zway hundert pfunt wienner pfenning an allez verziehen, und darumb haben wir in ze porgen geseczt unverschaidenleich zu sampt uns Chunrat von Freiberch den eltern und Reichkern den Sigenhaimer unsern hofmaister mit der beschaiden, ob wir in den vorgenanten ungelt auf di egenant zeit nicht einantwurten oder si irs obgenanten geltes nicht bezalten, so habent si vollen gewalt uns vorgenanten hertzog Stephan und uns egenant porgen ze manen ze laisten nach der vrist swanne si wellent, und alz bald wir von in gemant werden so su^ellen wir in an allez verziehen laisten yegleicher mit einem laistparn chnecht und mit einem pferd gein Everding in di stat hincz einem erbern wirt wo si uns hin zaigent; da su^ellen wir in hin laisten in geyselsweis alz laystens recht ist, und su^ellen da aus den laisten nimmer cho^emen als verr und als lang bis wir in allez daz volfu^ert und volrecht haben daz an dem brief geschriben stet. Waer aber daz in di laystung von uns verzogen wu^erd, swiegetarn schaden si dann irs vorgenanten geltes nemen den si sprechent, den su^ellen wir in auch ga^enczleich ausrichten ze sampt dem vorgenanten gelt und sullen daz haben dacz uns und unsern trewen. Mit urchund dicz briefs, den wir in geben mit unserm herczog Stephans insigel darzu mit meinem Reichkern dez Sigenhaimer insigel, dar under ich Chu^enrat von Freyberch mich mit meinen trewen verbind stat ze haben waz da vor geschriben stet wan ich meins insigels bey mir nicht het. Der geben ist ze Schaunberch an mitwochen vor Gally anno domini millesimo (trecentesimo) CCC^mo septuag./mo secundo.

Source Fulltext: OÖUB 8 (Wien 1883), S. 613f., Nr. 613