Wier Albrecht von Gots gnaden hertzog ze Oesterreich ze Steyr ze Kernden und ze Krain graf ze Tyrol etc. bekennen und tun kunt offenlich mit disem brif, daz wier dem erwierdigen hern Albrechten bischofen ze Pazzaw unserm lieben freunt durch seiner freuntschaft und dienst willen die genad getan haben und tun auch, ist daz die seinen hintz den unsern ichts ze klagen oder ze sprechen haben, darumb suellen si das recht von in nemen voer unsern houbtluten lantmarschalich oder vor andern unsern amptleuten es sey underhalb der Ens in dem hoftayding oder ob der Ens in landtayding. Ist aber daz die unsern hintz den seinen ze klagen oder ze sprechen hieten, darumb sullen si das recht nemen voer dem egenanten bischof oder vor seinen amptluten. Geschech aber daz yeman hintz dem bischoff selber ze sprechen hiet umb welicherlay weltlich sache das were, darumb sol er sich verantwurten ze seinen lebtegen voer unser oder vor unserm lieben brueder herczog Leuppolten und nicht anderswa. Davon gebietten wier allen unsern haubtluten lantmarschalchen und allen andern unsern lantherren rittern und allen andern unsern undertanen wie die genant sint den diser brief gezaigt wiert und wellen ernstlich, daz si den obgenanten bischoff bey derselben unserer gnad beleiben lazzen und da wider nicht tun in dhainen weg. Swer aber da wider tett das wer gentzlich wider uns. Mit urkund ditz briefs. Geben ze Wienn an freitag vor Symonis und Jude apostolorum nach Kristes gepurd dreutzehenhundert jaren und darnach in dem zway und sibentzgisten jare.

Source Fulltext: OÖUB 8 (Wien 1883), S. 615f., Nr. 615