Ich Hainreich aus dem Holtz und ich Hanns von Dichk ze den zeiten zechmaister der pfarr ze sand Gilgenperig und dar zu^o wir pfarrlawt all gemainleich und unverschaidenleich da selben verjehen, daz wir mit gemaynem rat und mit gu^eter vorbetrachtung geworven und gestift haben ain ewigew woehenmesse dew all wochen an dem mitichen unvertzogenleich gesprochen schol werden Got und unser fraw^on ze lob und allen gelaw^ebigen selen ze trost und zefraw^eden, und darzu ain vigilig und zwo messe die unser pfarrer von Ha^entten perig mit seim gesellen all cotember an dem sampstag in unserr vorgenanten pfarrkirchen auch unvertzogenleich begen und vollpringen schu^ellen, und die vorgenanten wochenmesse mit sampt der vigilig und auch die zwo messe in der cotemperwochen hat der erwu^erdig ga^estlich herr probst Hainreich ze Ranshoven besta^et und geewigt also beschaidenleich, daz wir unserm vorgenanten pfarrer von Ha^enttenperig und seim gesellen allew jar ja^erleich davon geben und rekchen schu^ellen zway pfunt pfenning wiener mu^enns dee denne gib und ga^eb ist aus dem zechschrein unserr vorgenanten pfarr, und schu^ellen in daz also geben zu^o yeder quatemper in dem jar ain halbs pfunt pfenning ewichleich an abganch und an allen iren schaden, und dez selben vorgenanten geltz gevallent dem pfarrer zway tayl und seim gesellen daz drittayl. Ta^et wir dez nicht zu welher vrist in daz vertzogen wu^erd, so gent all tag nach der vergangen vrist zwelif pfenning auf daz obgenant gelt alz lang untz daz si der rechten gu^elt mit sampt den phenning die dar auf gegangen sind ga^entzleich und gar gewert und betzalt werdent. und daz schu^ellen si haben auf unsers vorgenanten gotshaws hab wo ez die hat versu^echt oder unversu^echt, daz si sich der wol mu^egent underwinden und undertziehen mit unserm gu^etleichen willen und haizzen mit reht oder an reht wie si verlust, alz lang untz daz si schadens und hawpgu^otz gäntzleich davon becho^ement an allen iren geprechen. Ez ist auch getaydingt ob der vorgenant gotzdienst all wochen an dem mitichen und zu yeder quatemper an dem sampstag niht vollpracht wu^erd alz oben verschriben ist, so schol ez unvertzogenleich geschehen an dem na^echsten tag hin nach, und ob dez aber niht gescha^ech alz oft und alz manigen tag sich daz verget so habent der pfarrer und sein gesell alz oft zwelif pfenning abganges an dem obgenanten gelt der si an uns in dhaynerlay weis vordern noch mu^oten schu^ellen. Ez ist auch ze merchen ob ain veyrtag an den mitichen geviel, alz oft daz gescha^ech so hat der pfarrer mit ayner messe gewert und auch ob ain veyrtag an den ampstag in der quatemper geviel, so schol dew vigilig und die messe vor oder nach an aym andern tag begangen, und vollpracht werden und schol der pfarrer oder sein gesell den pfarrla^ewten chu^enden und mit in u^eberain werden dez na^echsten sunnta^egs vor der quatemper wochen. daz in und uns daz also ewichleich sta^et gantz und unzerbrochen beleib darumb zu^o aynem ewigen urchu^end der worhait geben wir in den prief versigelt mit dez erbern manns Mainreich von Raytenpuech ze den zeiten richter ze Weylhart anhangunden insigel. darunder wir uns all unverschaidenleich verpinden mit unsern trewn an aydes sta^et an geva^er sta^et ze haben ewichleich daz an dem prief verschriben ist. Der tayding sind zewg und taydinger gewesen herr Dyetreich ze den (zeiten ?) pfarrer ze New^enkirchen her Pawls pfarrer von Ha^enttenperig Ott Rawhenperiger Hainreich vonn Sta^edeln Chu^onrat Mayr auz dem holtz Ru^edel an dem kirchweg A^esperl von Hofstet und ander erba^er lawt genu^og. Daz geschach do man zalt von Christi gepu^ert drewtzehen hundert und in dem drey und sibentzigistem jar dez erigtags in dem pfingstveiren.

Source Fulltext: OÖUB 8 (Wien 1883), S. 650f., Nr. 651