ICH Herman der Schiek purger ze Wels ich Katrey sein hawsfraw und mit sampt uns all unser erben wier vergechen, daz bier ze chauffen haben geben der heyligen frawn sand Elspeten ierem spital ze Wels und den du^erfting di dar in sind und allen ieren nachcho^emen unser gu^et datz A^erpping gelegen in Pu^echiricher pharr daz unser rechtz freyzz hertzogyschs aygen gebesen ist von unsern gna^edigen herren den hertzogen ze O^esterreich und geho^ert in di vogtay ze Wels, mit allen den ern nutzen und rechten alz bier ez selber in gehabt haben um ain gelt dez bier gar und gantz von in verricht und gewert sein. Wier haben in auch daz vorverschriben gu^ot und swaz darzw geho^ert auf geben mit vogtz hant und mit aller stat und haben uns dez fu^ertzicht tan also, daz bier noch all unser erben fu^erbaz dhain ansprach darnach nyemer mer schullen haben noch gebin und schullen si allen ieren frum damit schaffen swi so sew dez verlust. Wier sein auch dez varverschriben gu^etz und swaz dar zw geho^ert ier recht gewer swo in dez no^et geschiecht alz chaufs recht ist und der vogtay recht ist ze Welz. Gierig in an der gewerschaft von uns icht ab, daz schullen si haben auf uns und dar zw auf aller unser hab swo bier haben. Daz in di red also sta^et und unverchert peleib dar uber ze aim ba^ern u^erchund geben bir in den prief wesigelt mit meim anhangunden insigell, und ze ainer pezzarn sicherhait und sta^ettigung wesigelt mit dez erbern mans Hiltprantz von Albrechtzhaim ze den zeiten vogt ze Wels anhangunden insigelln, mit dez hant di handlung und di sta^et geschechen ist. Der prief ist geben dez vreytags nach sand Cholmans tag do man zalt von Christes gepu^erd drewtzechen hundert jar dar nach in dem drew und sybentzkisten jar.

Source Fulltext: OÖUB 8 (Wien 1883), S. 662f., Nr. 660