Ich Lienhart der Swennter ich Kathrei sein hausfrow und all unser erben verjehen offenleich mit dem brief, daz wir mit gutem willen gesambter hannt nach erber läut rat daz gericht ze Peilstayn und waz wir doselbs heten versucht und unversucht daz uns alles stund von dem ernwirdigen pystumb ze Pazzow umb sechtzk pfunt wienner phennynge, mit allen eren rechten und nützzen dem erbern hern Andren dem Gruber unsers genädigen herren bischof Albrechts ze Pazzow marschalich seiner hausfrown und iren erben aus unserr nutzz und gewer in di iren und unser brief di wir darüber heten mit allen punten und artikeln redleich zelösen geben und in geantwurtt haben umb sechtzk pfund wienner phennyng der si uns gentzleich berait gewert habent also, daz wir unser erben und freunt noch ander nyemt von unsern wegen dohin dhain ansprach noch vodrung nimer haben und nicht gewinnen süllen weder mit recht noch an recht ungevarleich. Auch mügen si allen iren frum domit handln schaffen und schickchen wie oder wenn si wellent in der mazz als es uns gestanden ist an gevar. Sunderleich lüben wir in unverschaidenleich, daz wir des egenannten satzz ir gewer und fürstand wellen sein als des lantz recht ist do Peilstayn inne leit an allen iren gepresten. Taten wir des nicht wiegetann schaden si des nement, ir ains trewn an aid unberecht ze gelauben, den sullen wir in abtun und widerchern. Und habent dohin an aller stat allew irew recht erlangt daz wir nichtz geniezzen mügen, und wer darüber den brief mit des obgenannten herrn Andres des Grüber seiner hausfrown und irr erben willen inne hat oder zaigt, der hat allew die recht di in daron sind geschriben. Mit urkünd des briefs der besigelt ist mit meinem Liennhartz des Swenntner anhangundem insigel und zu ainer getzeugnüzz mit des ersamen Fridreichs des Chraftz burgermaister und mautter ze Pazzow insigel. Der brief ist geben an sand Gallen tag do man zalt von Christes gepürd dreuczehenhundert jar und in dem drew und sybenczkistem jar.

Source Fulltext: OÖUB 8 (Wien 1883), S. 663f., Nr. 661