ICH Chu^enrat der Rueczlersperger von Langenwisen und ich Ann sein hausfrawe und all unser eriben wier vergehen, daz wier geschafft und geben haben nach unser paider to^ed unser leibgeding daz wier haben auf dem halben hof dacz dem Altenperig zu unser frawen messe ze sand Gallneunchirichen mit allen den eren rechten und nu^eczen die darzu^e geho^ernt, durch unser paider sel und unserer vorvodern sell und aller gelaubhaftigen sel hail und saelden willen zu einer ewigen gedaechtnu^ezz also, daz ez von der vorgenanten unsrer frawen messe ewichleichen nimmermer cho^emmen schol noch mag. Sich schullen auch nach unser paider to^ed wer die czeit pharrer ze sand Gallneunchirichen ist und die czechmaister daselbs dez vorgenanten unsers leibgeding underwinden und inne haben und nach iern trewn und der erbern pharrlewt rat der vorgenanten unser frawen messe paewleich legen und zu^estiften, also si sein gein Got und gein unser frawen auch geniezzen wellen an sel und an leib. Daz di red und daz geschafft also staet und unczebrochen beleib, daruber geben wier dem wolbierdigen hern . . dem pharrer . . den czechmaistern und den pharrlewten den brief versigelten mit dez wolwierdigen geystleichen hern hern Steffanns zden czeiten techent und pharrer ze sand Gallneunchirichen und der erbern und weysen Eberharts dez Stadler zden czeiten phleger ze Ryedek und Fridreichs dez Volchrat und unsers genaedigen hern Maricharts dez O^eder anbangunden insigeln, wann wier zder czeit nicht aygens insigelheten. Der brief ist geben nach Christes gepuerd drewczehenhundert jar und darnach in dem vier und sybenczkisten jar dez nachsten freytags nach sand Veyts tag.

Source Fulltext: OÖUB 8 (Wien 1883), S. 703f., Nr. 693