Dem edln hochgebo^ern meinem genedigen herren graf Fridrichen purggrafen ze Nu^ernberg empiet ich Seyts von Chu^enrring herr ze Seveld meinen steten undertennigen dienst mit ganczen trewn. Lieber herr, ich tu^on ewern gnaden ze wizzent daz wir (von) ewern vo^edern seligen und ew mein vo^edern und ich die gnad habent, daz wir alle di lehen die wir von ewern gnaden haben in dem lande ze O^esterreich wie di genant sint, geschaffen und gemachen mu^egent wem wir wellent ez sein fraw^en oder man die der lehen geno^ezz sint, als der prief den ich daru^emb han wol weiset. Nu^e han ich die vest und di herschaft Seveld und alles daz darzu^e geho^ert, lewt und gu^et und alle andrew gu^eter die ich von ewern gnaden ze lehen han wo die gelegen sint, das vorgenant guet alles hab ich halbes gemacht durch lieb und frew^endschaft willen meinem lieben swager hern Haidenreich von Meizzaw obrister schench in O^esterreich und seinen erben, den andern halben tail der vo^ergenanten vest Seveld und aller andern gueter mit lewt und mit gu^et han ich gemacht meinen liben o^eheymen hern Ru^edolfen hern Reinprechten und Fridreichen gebru^edern von Waltse und iren erben und Jorigen von Waltse ierem vettern und seinen erben also beschaidenlich, ob daz wer daz ich an erben abgieng, so schullen di vorgenanten lehen auf sew erben und gevallen alz vor geschriben stet nichts ausgenomen dann waz ich meiner liben hausfraw vron Margreten aus den selben guetern gemacht han, daz sol si haben ier lebt teg als di prieff sagent di si von mir daruber hat. Daruber so pitt ich ewer gnad lieber herr mit ganczem ernst und fleizz, daz ir daz selb gemecht mit ewern priefen bestetet und in leihet als ewer prief sagent die ich von ewern vo^edern darüuber han, ymer durichh meins ewigen dienstz willen. Und des ze urchu^end sent ich ewern gnaden den offen priefe besigelt mit meinem anhangunden insigel und mit meins liben öhayms hern Eberhartz des eltern von Chappeln insigel der dez ewer gnad mit sampt mier fleizzig pitt. Geben ze Seveld an sant Andres tag des heiligen zwelifpoten nach Christes geburd dreuczehen hundert jar darnach in dem vier und sibentzigisten jar.

Source Fulltext: OÖUB 8 (Wien 1883), S. 728f., Nr. 714