ICH Dyemu^et hern Hermanns wittib von Lanndenberch dem Got gnade und ich Pernger von Landenberch ier sun und alle unser erben wier vergehen, daz wier verchoufft und geben haben den erbern herren hern Ru^edolffen hern Reinprechten und Fridreichen gepru^edern von Waltse und allen ieren erben von erst mit unsers lehen herren hant des hochgeporn fu^ersten hertzog Albrechts ze O^esterreich ze Stewr ze Kernden und ze Krayn graf ze Tirol etc. unsers rechten lehens daz wier von im ze lehen gehabt haben unser vestt genant Rotenekk gelegen in der grafschafft ze Woeschsenberch und alle die guter und zehent die zu derselben vest geho^erent, die gelegen sint in Freynsteter gericht, und alle die ho^eltzer vischwaid wiltpan wayd wismad und paw so zu derselben vestt geho^eret wo das pei der vest und darumb gelegen ist, und alle die manschafft die zu derselben vest geho^eret und die wier in der grafschafft ze Woechsenberg und in Freynsteter gericht gehabt haben das alles von dem egenanten unserm herren dem hertzogen lehen ist, und dient man alle jar von einer wis gelegen under der vestt hintz sand Peter gen Ho^eflein zwen und dreizzig phenning und gen Pabenberch vier und zwaintzig phenning und gen Veldchirihen hintz sand Michel in die wydem achtzehen phenning. Dartzue haben wier verchoufft mit unsers lehenherrn hant des hochwierdigen fu^ersten bischof Albrechts von Pazzow unsers rechten lehens das wier von im und denselben gotshaws ze lehen gehabt haben einen hof gelegen in der Grueb mit allen seiner zuegeho^erung, und den zehent den wier gehabt haben in der grafschaft ze Wechsenberch grozzen und chlainen wie der genant ist. Auch haben wier verchowfft unsers rechten lehens das wier von dem bischof und dem gotshaws ze Pabenberch ze lehen gehabt haben einen hof gelegen ze Graspach und einen hof gelegen ze Pagendorf und alles daz das zu denselben zwain ho^efen geho^eret, und sechtzig phenning und ein lamp vogtrechts gelegen auf einem hof daselbens ze Pagendorf, und dreizzig phenning geltes auf einem gu^et das genant ist datz dem Choch an der O^ed. Die vorgenanten, vestt Rotenekk mitsambt den vorgeschoben gu^etern und alles das das zu derselben vestt und zu den vorgenanten gu^etern allen geho^eret, und alles das daz wier in der grafschafft ze Wechsenberch und in Freynsteter gericht gehabt haben, es sey manschafft vogtrecht vischwaid zehent ho^eltzer wiltpan ho^ef behawsts gu^et u^eberlent waid wismad paw gestifft und ungestifft versu^echt und unversu^echt wie so das genant ist, haben wier den egenanten hern Rudolffen hern Reinprechten und Fridreichen gepru^edern von Waltse und allen iren erben recht und redleich ze chouffen geben mit allen den nu^etzen ern und rechten als wier es alles in lehens gewer herpracht haben nichts ausgenomen, umb ein gut das wier berait von in enphangen haben und dez gantz und gar verrichtet und gewert sein also, daz si und alle ier erben sullen fu^erbas die egenanten vestt und gu^eter mit aller ierer zuegeho^erung und mit allen den nu^etzen ern und rechten so vorgeschriben stet ledichleich und vreileich haben und allen iern frumen damit schaffen verchouffen versetzen und geben wem si wellen an allen ierrsal. Und das der chouf fu^erbas also stet und untzebrochen beleib dar u^eber so geben wier ich obgenante Dyemu^et und ich Pernger von Lanndenberch ier sun fu^er uns und fu^er alle unser erben den vorgenanten von Waltse und allen ieren erben den brief zu einem warn urkund der sache versigilten mit unsern insigilen, und mit der erbern herren insigilen hern Wernharts von Meissow obrister marschalich und zu den zeiten lantmarschalich in O^esterreich hern Wolfgang vonn Winnden unsers o^ehems und Ulreichs von Liechtenekk. Der brief ist geben ze Wienne nach Christes gepu^erde drewtzehenhundert jare darnach in dem fu^emf und sibentzgistenn jare des sambstags in der ersten vastwochen.

Source Fulltext: OÖUB 8 (Wien 1883), S. 749f., Nr. 727