Wir Albrecht von Gots gnaden herczog ze O^esterreich ze Steyr ze Kernden und ze Krayn graf ze Tyrol etc. bekennen, daz fu^er uns kamen unser getrewen lieben Jo^erg der Heusler und Mari¬chart sein sun und gaben uns auf iren tail an der veste ze Purgstal und swas dar zu^o geho^ert das von uns ze lehen ist, und paten uns vleizziklich daz wier das verleihen geru^ochten unserm lieben getrewen Hainrichen von Walsse, yeczund unserm haubtmann ob der Ens wan si nu das verchauft hetten. Das haben wier getan und haben den egenanten tail an der veste ze Purgstal und swas darzu^o geho^ert das in der egenanten Heusler kaufbrief verschriben stet und von uns ze lehen ist dem egenanten Hainrichen von Walsse von Ens verlihen, und leihen im ouch mit disem brief wizzentlich was wier im ze recht daran leihen sullen oder mugen nach sag der brief die derselb von Walsse von in daruber hat, also daz er und seine erben das von uns unserm lieben bru^oder hercog Leupolten und von unsern erben in lehens weise innehaben besiczen und niezzen sullen und mugen als landes und lehens recht ist ungeverlich. Mit urchund dicz briefs. Geben ze Wienn an sand Gregorien tag nach Kristes gepurd dreuczehenhundert jar und darnach in dem fu^enf und sybenczgisten jare. Dominus dux.

Source Fulltext: OÖUB 8 (Wien 1883), S. 747, Nr. 725