Ich Gedrawt hern Offen tochter von Arberkch vergich fu^er mich und fu^er all mein erben umb das drittail der vest zu Pu^eten mit aller zu^egeho^erung das mir mein lieber prueder Chunrat von Arberkch ledichleich geben hat nach meins priefs sag den ich dar uber hab, und das zu lehen ist von meinen genedigen herren und hochgeporn fu^ersten hertzogen Albrechten und hertzog Leuppolten in Osterreich, das ich das meinem liebem wirt Hansen von Winden gemacht und geben han und gib ims auch mit dem prief also beschaidenleich, ob mich mein vorgenanter wirt Hans von Winden uberlebt, so schol das vorgenant drittail an der vorgenanten vest zu Pu^eten mit aller zugeho^erung sein sein also, das er seinen frum da mit schaffen schol verchauffen versetzzen und geben wem er wil an aller meiner erben irrung. wer aber das das ich meinen vorgenanten wirt Hansen von Winden uberlebt, so schol das vorgenant drittail an der vest zu Puten mit aller zugehorung mein sein und mag das geben wem ich will an all irrung. Das im das alles stet beleih dar uber gib (ich) vorgenante Gedrawt hern Offen tochter von Arberkch im den prief zu einer urchund der warhait versigelt mit meinem aygem anhangundem insigel, und zu einer pezzern getzeugnuzz und sicherhait versigelt mit hern Fridreichs von Leybintz anhangundem insigel und mit Ruedleins des Pernekker anhangundem insigel und mit hern Hansen des Gradner anhangundem insigel. Der prief ist geben nach Christes gepurd drewtzehen hundert jar darnach in dem fumf und sybentzkisten jar am mitichen vor dem sunibenttag.

Source Fulltext: OÖUB 8 (Wien 1883), S. 764f., Nr. 742