Ich Gedraut hern Offen tochter von Arberch vergich umb di gu^eter di mir mein erster wirt seliger herr Erasm von Pernekk gemacht und geben hat, es sey margengab oder haimstewr di Offerl der Pernekker von mir gelost hat und geledigt hat umb fumfthalb hundert phunt wienner phenning, das ich di vorgenanten fumfthalb hundert phunt gueter wienner phenning oder gu^oeter da man di vorgenanten phenning anlegt, meinem liebem wirt Hansen von Winden gemacht und geben han und gib yms auch mit dem prief also beschaidenleich, ob mich mein vorgenanter wirt Hans von Winden uberlebt, so schullen di vorgenanten fumfthalb hundert phunt phenning oder di gueter da man di vorgenanten phenning an legt meins vorgenanten wirt Hansen von Winden sein also, das er seinen frum da mit mag schaffen verchauffen versetzzen und geben wem er wil an aller meiner erben irrung. Wer aber das das ich meinen vorgenanten wirt Hansen von Winden uberlebt, so schullen di vorgenanten fumfthalb phunt phenning oder di gu^eetter da man di man (sic) di phenning anlegt, mein sein und di mag ich geben und schaffen wem ich wil an allew irrung. das im das alles stet beleib dar uber gib ich vorgenantew Gedrawt herrn Offen tochter von Arberkch im dem prief zu einer urchund der warhait versigelt mit meinem aygen ahangunden (sic) insigel, und zu einer pezzern getzeugnuzz und sicherhait versigelt mit herrn Fridreichs von Leybintz anhangunden insigel und Ruedleins des Pernekker anhangimdem insigel und mit hern Hansen des Gradner anhangundem insigel. Der prief ist geben nach Christes gepuerd drewtzehen hundert jar dar nach in dem fumf und sybentzkisten jar amb mitichen vor dem sunibent tag.

Source Fulltext: OÖUB 8 (Wien 1883), S. 763f., Nr. 741