Wir Albrecht von Gots gnaden herczog ze O^esterreich ze Steyr ze Kernden und ze Krain graf ze Tyrol etc. tu^on chunt umb die krieg und stozz die gewesen sind zwischen den erbern geistlichen unsern lieben andechtigen dem probst und dem convent des goczhauses ze sand Florian an aim tail und den purgern unserr stat ze Ens an dem andern tail von ainer aw wegen gelegen in der Tu^onaw ze nest under dem haus Spillberg, darumb wir unsern getrewn lieben Haidenraichen von Meissow zu^e den zeiten lantmarschalen in O^esterreich darczu^o schikten mit vollem gwalt dieselben krieg und stozz nider ze legen und auz zerichten, wie in deuchte nach gelegenhait der sache daz es peden tailen aller fu^eglichest were, und schu^offen ouch mit unsern purgern ze Ens swie er dieselben sache auzrichtet daz si es dabei beleiben liezzen und stat hielten. Daz darumb der egenant Haidenreich vor uns gewesen ist und hat uns ze wizzen getan, daz er dieselben stozz bericht habe mit einer tailung derselben aw die er also getan hab, daz er von der marich die unser getrewr lieber Eberhart von Kappell der elter vormals gemachet hat durch die aw nach der praite gegen dem egenanten haus ze Spilberg die egenanten aw durch die mitte nach der lenge abe uncz in daz ort getailt und mit steken auzgezaihent hab, und daz der tail gelegen gegen der stat ze Ens fu^erbaz bey der stat beleiben sulle und der ander tail sulle gehoren zu^o dem egenanten haus ze Spilberg. Und wan wir chundlich beweiset sein daz dieselb tailung der aw peden tailen füglich sey, darumb haben wir die vorgenant taylung besta^ett und bestetten si ouch wizzentlich und wellen, daz si also furbaz ewiklich beleibe an alle widerred, und gebieten peden tailen ernst¬lich daz si es ouch dabey beleiben lazzen und dieselben tailung also halten und dawider nicht tu^on in dhainen weg an alles gever. Mit urchund dicz briefs. Geben ze Lincz an phincztag vor dem suntag so man singet jubilate, nach Krists gepurd dreuczehen hundert jar darnach in dem funf und sibenczigistem jare. Dominus dux per Haidenricum de Meissowe predictum.

Source Fulltext: OÖUB 8 (Wien 1883), S. 757f., Nr. 735