ICH peter der Hinderholtzer zden Zeiten Purgraf ze Steyr vergich vnd tu^e chunt offenleich an dem prief vor allen lewten gegenwu^ertigen vnd chunftigen vmb daz holtz, daz zu^e dem gut ze Stekchenfu^ert geho^ert in dem Tanpache gelegen, daz Marcharten dez Raentschen ist purger ze Steyr, auf dasselbig holtz etwivil ansprach von der herschaft wegen was, daz ez zu^e den fo^ersten geho^ert sult haben. Desselben gab ich beschawe darauf von der herschaft wegen die erbern lewtt die forster, die Amptlewt vnd die vmbsaezzen, daz si ez aigenleich vnd chundleich beschawen sulden, wellent ez durich recht hin geho^eren sult, zu den fo^ersten oder zu^e dem gu^et. Die taten daz vnd beschawten ez: nach derselben beschawe vragt ich si pei ir aid vnd pei ir trewn, wo ez rechtleich hin geho^eren sult . die sagten pei ir aide vnd pei iren trewn, als ich si gevragt het, vnd sprachen, daz ez von alter her als verre, vnd si sein gedaechten, zu^e demselben gu^et geho^eret hiet vnd auch noch rechtleich darzu^e geho^eret. Vnd daz sage ich pei meinen trewn, daz sich dieselbig handlung also pei mir vergangen hat . mit Vrchunde dez offen priefs versigilten mit meinem anhangunden jnsigil vnd zu^e ainer gu^eten getzewgnu^essee mit dez erbern Hertneyds dez Hu^ernbekchen anhangunden jnsigil, der auch pei der beschawe vnd handlung gewesen ist. Geben nach Christi gepu^erde Drewtzehen Hundert jar, darnach in dem Sechs vnd Sibentzgisten iar.

Source Fulltext: OÖUB 9 (Wien 1906), S. 182-183