Wir graf Hainreich von Schöunberch bechennen und tu^en chunt offenleich mit dem brief, daz die erbergen und geystleichen lau^et her Fridreich probst ze sand Nycla ze Pazzaw und daz capitel da selbs bey uns gewesen sind und habent uns mit gu^eten briefen underweist die si heten von unsern vorvodern umb die freyung die si habent an unserr mautt ze Aschach Wann wier nu Gots gabe und gu^eten werich die unser vorvodern geben und gehandelt habent nicht abnemen sunder pezzern schu^ellen und auch mainen ze allen zeiten, haben wier angesehen daz sich der vorgenant probst und sein capitel mit ier andacht und gu^otem willen uns und den unsern in allen sachen dienstleich erzaigent, und haben in ier vorgenanteu freyung durch Got von besundern gnaden und durch ierr fleizzigen pet willen vernewet, also daz si järleich all ier wein getraid speiz und zimmerholtz oder wez si bedu^erffend sind zu ierm gotzhaus und zu den gu^oten die dar zu^o geho^ernt und daz si beweisen mugent daz ier sey wie daz genant ist, frey und ungemautt ze Aschach fu^erfu^eren schu^ellen, und sind uns darumb nichts gepunden ze geben denn alle jar ja^erleich acht metzzen waitzz Efferdinger mazze, und von dem vertiger daz gewo^endleich recht von dem poden zwelif und den chnechten zwen wienner phenning ze letzz und von den flössen von jedem ru^eder vier wienner phenning, auch sol der vorgenant probst und sein nachchomen uns unsern vorvodern und nachkomen alle jar haben ain gedachtnu^ezz an sand Briccy abent mit der vigili und an dem tag mit einem selampt unsern selen ze hail und ze saelden, und schol der oftgenant probst und sein nachkomen darumb raichen und geben dem herren der daz ampt singt und under daz capitel tailen nach seiner gewissen ain phunt wienner phenning, und umb die vorgenanten gedaechtnu^ozz und vodrung als vor geschriben stet wellen wier und mainen auch ernstleich, daz all unser mautter und amptlau^et ze Aschach nu und fürbaz bey uns und unsern nachkomen daz egenant gotzhaus bey der vorgenanten freiung und genaden ewichleich beleiben lazzen. Des geben wir ze u^erchunde den brif versigelten mit unserm grossen anhangundem insigel, der geben ist ze Schownberg an suntag nach sand Thomas tag dez heiligen zwelifpoten do man zalt nach Christes gepu^erd dreutzehen hundert jar und darnach in dem fu^emf und sibentzkistem jare.

Source Fulltext: OÖUB 8 (Wien 1883), S. 794f., Nr. 768