ICH Stephan der Schekche vnd mein hawsfraw, wir vergehen vnd tun chunt mitsampt vnsern erben an dem offen prief allen den, die den brief sehent, ho^erent lesen oder lesent, die nu lebent vnd hernach chunftig werdent, Daz wir mit wolbedachtem mu^et, mit gunst vnd willen vnser erben zu^e der zeit, vnd wir daz mit recht wol getu^en machten, recht vnd redleich gemacht vnd gegeben haben durich vnser vnd vnser voruordern aller seie, hail vnd trost willen, ain Gu^et ze waitarn, da zu^e den zeiten Dietreich der Wiser aufgesezzen ist, vnd zwo Hofstet, die in dasselbig gu^et geho^erent, dem Spital ze Steyr vmb ain ewigs liecht, daz darinne prinnen sol, tag vnd nacht, dasselbig gu^et wir in daz Spital ze Steyr gegeben haben mit allen den rechten vnd nuczen, die darzu^e geho^erent vnd davon becho^emen mugen versu^echt vnd vnuersu^echt, als ez von alter her cho^emen ist, Also, daz man von demselben gu^et, wer darauf siczet vnd inne hat, aller iar ierleich vnd ewichleich davon raihen vnd geben sol in daz Spital ze dienst an vnser frawn tag zder dienstzeit an zwen phenning zehen schilling wi^enner phenning vnd vns vnd vnsern erben zwen phenning fu^er ain vogthu^en zu ainem vrchunde vnd warczaihen, daz wir desselben gu^ets dez Spitals vogt su^ellen sein vnd sullen auch dhain stewer geben noch dhainerlaye ander vorderung mer, Denne als vil wenne ain wandlung auf dem gu^et geschieht, so sol man dem Spital geben, der da aufvert, fumftzehen phenning ze anlait, vnd der abvert, als vil ze abvart vnd nichtes nicht mer. Wa^er aber, daz vngelukche dar vnder cha^em, ez wa^er von schawer oder von pisezzes wegen oder von sweliherlaye sache daz wa^er, daz . daz gu^et dez diensts nicht getragen mo^echt, was denne da wa^er vnd geuallen mo^echt, mit demselben sol man daz liecht awsrichten, als verre ez geraihen mag. Wa^er aber, daz . daz liecht nicht awsgericht wurde, vnd nicht volpracht wurde rechtleich, die weil daz gu^et den dienst tragen mag vnd trait, ez wa^er von sawmung dez Spitalmaister oder von swelicherlaye wegen daz wa^er, da sullen wir die purger vmb ze rede setzen . ist denne, daz ez nicht gewendet wi^ert, so mugen wir vnd sullen dasselbig gu^et anderswo hin machen vnd geben, wie vns verlustet. Daz die rede furbas staet vnd vnuerchert beleib, darvber gib jch Stephan der Schekche dem Spital den prief zu^e ainem waren vrchunde der warhait versigilt mit meinem anhangunden jnsigil vnd zu^e ainer gu^eten geczewgnu^ezze mit meins vettern Hainreichs dez Schekchen vnd mit Petreins des Hinderholczer zden zeiten purgraf ze Steyr vnd mit Eberharts dez Mulbanger zden zeiten Statrichter ze Steyr anhangunden jnsigiln in an schaden. Geben nach Christi gepurde Drewtzehen Hundert Jar, darnach in dem Sechs vnd Sibentzgisten Jar an sand Giligen tag.

Source Fulltext: OÖUB 9 (Wien 1906), S. 143-144