Wir Albrecht von gotes gnaden Herczog ze O^esterreich, ze Steyr, ze Kernden vnd ze Krain, Herre auf der Wyndischen Marich vnd ze Portenaw Graf ze Habspurg, ze Tyrol, ze Phirt vnd ze Kyburg, Marggraf ze Burgow vnd Lantgraf in Elsazz, Bechennen vnd tu^on chunt offenlich mit disem brief, Daz wir nach guter Weisung vnd zeitigen rate vnserr Frewnde, Herren, vnd vnsers Rates durch besunders frumen vnd gemaches willen vnser selbs vnd vnser Land vnd Leute vberein komen, vnd ze Rate worden sein, daz wir mit dem Hochgebornen Fürsten, vnserm lieben Brüder Herczog Leupolten Herczogen ze O^esterreich zc. liepleich vnd aynmu^etichlich leben vnd in bru^ederlicher freuntschaft bey im beleiben wellen, getrewlich an allez geuer, vnd argelist. Geschech aber, des Got nicht welle, daz zwischen dem egenanten vnserm brüder vnd vns dhain missehelle oder vnwille auferstu^ende, wie oder in weihen Sachen das zu^ogieng, vnd er tailung vnserr Fu^erstentu^emen, Lande vnd Herrscheften an vns vorderte, So sullen vnd wellen wir Im derselben tailung stat tun vnd gehorsam sein, Vnd auz vnserm Rat drey darczu^o schiken, zu^o den drin, die er auz seinem Rate auch darzu^o benennen vnd seczen sol. Dieselben Sechs sullent darumb zu^o den Heiligen sweren, vnd anheben den tail ze tu^onde, in dem ersten Manod nach der vorgeschriben vorderung, vnd ouch denselben tail tu^on darnach an vnderlas. die Purg ze Wienn halbe von einander, so si geleichest mugen, die Stat daselbs ze Wienn halbe von einander, auch so si geleichest mu^ogen vnd das Land ze O^estereich von einander in zway tail vnd darnach Land gegen Land oder ye das Land in zway tau, Also daz derselb tail in solicher mazze getan vnd volbracht werde ynner den nechsten Sechs Manöden nach dem vorbeschaiden anuange der tailung. Wie ouch dieselben Sechs des vorgeschribnen tails vberein koment vnd den auzbeschaident bei iren ayden, dabei sol es beleiben, vnd sullen vnd wellen wir das stet haben, Vnd den tail mit dem Los aufnemen, an alle widerred, vnd geuer. Welich drey auch der vorgenante vnser bru^oder zu^o der tailung benennet vnd schiket, die sullent mitsampt den dryn, die wir darczu^o schiken, die taylung tu^on getrewlich vnd vngeuerlich ane alles vercziehen, Vnd sullen wir zu^o den selben dreyn darumb kainen vnwillen veyntschaft noch vngnade haben noch gewinnen, in dhain weis an geuer. Were aber daz dieselben Sechs tailer ye dem tail von wegen der Lande, Herscheften oder der güter vnd gülte die in den Landen vnd Herscheften gelegen sind, an dhainen Stüken missehellig vnd stözzig wu^erden, das sullen si bringen an den Hochgebornen Purggraf fridichen von Nüremberg vnserm lieben Sweher, vnd swaz der vmb dieselben missehelle vnd sto/zze bei seinen trewn sprichet, vnd wie er die auzrichtet, dabei sol es beleiben an widerred vnd geuerd. Vnd sullent dieselben tailer darnach vnd si solich sto^ezze vnd missehelle, an den vorgenanten Burggraf friderichen bracht haben, an allen aufschu^ob, zu tailung der andern Herrscheften vnd gu^eter greiffen, vnd die tu^on als vorgeschriben stet. Gescha^ech auch, daz wir die tailung verczugen, irrten oder nicht vollefu^orten, als vor beschaiden ist, So sullent die Hou^optleut vnd Amptleute, wie die genant sind, aller vnser Lande dem egenanten vnserm lieben Bru^oder, mit allen gülten, Rechten vnd geweiten, gehorsam vnd gewe/ortig sein, an allen vnsern zorn vnd widerred, als lang vncz im die teilung genczlich wideruert vnd vollefüret wirdt, als vorgeschriben stet an allez geuer, vnd argenlist. Vnd daruber zu vrchund Sicherheit, hiessen wir vnser grozzs fürstleich Insigel henken an diesen brief. Vnd haben darczu^o gebeten den vorgenanten Burggraf ffriderichen von Nüremberg vnsern lieben Sweher, vnd die edeln graf Hainreichen von Montfort vnd Graf friderichen von Ortemburg, vnser lieben Öhemen vnd die edeln vnser getrewen lieben, graf Burchart von Maidburg, Graf Herman von Cili, Vogt Vireichen von Mitsch, Grafen von Kilchberg, Wernharten von Meissaw obristen Marschalich vnd zu den zeiten Lantmarschalich, Haidenreichen von Meissaw obristen Schenken in O^esterreich, Petern von Torberg, vnsers vorgenanten lieben Bru^oders Hofmeister, Hannsen von Liechtenstain von Nicolspurg vnsern Hofmaister, Hainrichen von Walsse, Hauptman ob der Ens, Rudolffen von Walsse, Hauptman in Steyr, Otten von Stubemberg obristen Schenken in Steyr, Hainreichen von Rotemburg Hauptman vnsrer Grafschaft ze Tyrol, Chunraten den Chreiger Houptman in Krain, Niclasen den Schenken von Ostrawicz vnd Volken den Awrsperger, daz si ze geczewgnusse der vorgeschribnen dingen ire Insigel zu^o dem vnsern ouch gehenkt habent an disen brief, Wir die vorgeschriben alle gemeinlich vnd vnser yklicher besunderlich, Bekennen offenlich daz wir durch fleizziger bete willen des egenanten vnsers Herren Herczog Albrechts der vorgeschribnen sache geczeug sein mit vnsern Insigeln, di wir zu^o dem seinen gehenket haben an disen brief. Der gegeben ist ze Walsse an dem abende des heiligen Prehemtage, Nach kristes geburt dreuczehen hundert iar darnach in dem Sechs und Sibenczigisten Jare.

Source Fulltext: OÖUB 9 (Wien 1906), S. 1-3