Ich. Haertneid der Elter Chuchlaer di zeit Pfleger ze obernberg, ich hertneid, ich Caspar vnd ich Eberhart di Chu^echler sein Su^en wir veriehen fu^er vns fu^er all vnser eriben vnd nahchomen offenbar an dem prief vnd tu^on chu^end allen den di in sehent oder ho^erent lesen, das wir mit wol bedahten mu^ot vnd mit gu^otem willen alleu di Manschaft vnd lehenschaft di vnser Su^onder freunt di Goldekker¹⁾ chaufft habent von Ortlieben dem fra^enchinger, also haben wir sey, versu^ocht vnd vnuersu^ocht recht vnd Redleich ze Chauffen geben vnserm O^ehaym her Ekharten dem Tanner, und allen sein eriben. vnd habent vns auch di vergolten mit Beraiten pfenning, daran vns wohlgenuegt hat. Wir haben in, auch di selb manschaft vnd lehenschaft auf geben vnd Richtig gemacht mit herren²⁾ hant vnd haben in deu, ein geantwu^ort aus vnser nu^oczz und gewer, in ir nu^ocz vnd gewer, Also das wir noch vnser Eriben vnd nachchommen noh niempt von vnsern wegen fu^erbas dhain ansprach dar auf haben schullen mit Recht noch an Recht gaistleich noch weltleich, noch mit dhainer lay sache an als geuerd. Wir schullen auch der vorgnanten Manschaft vnd Lehenschaft ir geweren vnd fu^erstand sein fu^er alleu ansprach, wa in des not geschiht, nach des Landes recht, an als geuaer vnd schullen si das haben dacz unsern trewen vnd auf aller vnserr hab, wie di genant ist, oder wa wir di haben inner Lants oder auzzer Lants, sie sei besu^ocht oder vnbesu^ocht. Das in daz staet vnd vnczerbrochen beleib, dar vber ze ainem vrchuent(!) der warhait geben wir in den Brief Besigelten mit vnser obgnanter Haertneids des Eltern Ku^ochler, Hertneids vnd Caspars seiner su^en, aigen anhangunden Insigeln, So vergich ich Eberhart der Chu^ochler das ich nicht insigels het, di zeit vnd han peten mein lieben Vettern hern. Chu^onrad den Ku^ochlaer ze Fridburg, das der sein Insigel an den Brief hat gelegt im vnd sein erben an schaden, vnter die vorgenanten Insigel verpintent sich vnser Hausvrawn vnd all vnser eriben vnd Nach Chomen, mit iren Trewen, alles daz staet ze haben vnd ze volfu^eren, was der brief sagt, der geben ist ze Salzburg an sant Valteins tag³⁾, nach Christi gepu^ord drewzehen hundert iar vnd dar nach in dem sechs vnd Sibentzigistem Jar.

Source Fulltext: OÖUB 9 (Wien 1906), S. 5-6