Jch Weikchart von Topel von Karelsteten vergich, —, das ich, —, gegeben han meiner lieben Snver Margreten hern Chadolts Tochter von Haselaw, dem Got genad, zu meinem Svn Otten von Topel irm eleichem wirt fu^or Sechs hundert phunt Wienner phennig ze rechter Margengab nach des Lanndes recht ze Österreich meins rechten aigens meinen hof gelegen ze Pu^olkendorf, vnd dartzu^o zwaihundert ieuch Holtzes gelegen in dem Akxswald vnd hundert vnd ain vnd dreizzig ieuchart akchers, fümftagwerch wismats vnd ain aw vnd dreitzehen Schilling wienner phennig geltes gelegen auf einer mv^ol vnd auf fv^omff hofsteten, das alles zu dem vorgenanten Hof geho^ert vnd meinen Hof gelegen ze Weykendorf mit aller seiner zugeho^erung ze veld vnd ze dorff, darnach auf einem Hof gelegen ze Tawbenwankch fümf vnd viertzig metzen chorns, fümf vnd viertzig metzen Habern, zwelif Rabenstainer ches, ein halb phunt phennig fu^or ein Sweyn, zwo gemest Genns vnd zwai vaschanghuenrr geltes, darnach auf einem Hof ze Ryding ain phunt phennig, zwelif Rabenstainer Ches vnd vier Vaschanghuenrr, geltes, vnd auf einem Lehen gelegen ze Etzing ein halb phunt phenni^eg vnd fu^omftzehen rabenstainer ches geltes, vnd auf ainem Lehen gelegen ouf dem Graben zwelif rabenstainer Ches, vnd zwai Herbsthuener gelts, vnd auf einer Hofstat ze Haeperch da zu den zeiten Janns aufgesezzen ist zwelif rabenstainer ches, ein Herbsthuen vnd ain vaschanghuen geltes, vnd ouf einem Hof gelegen ze Marichartstorf, da zu den Zeiten Seydel aufgesezzen ist, ainen mutt chorns vnd Sechs vnd zwaintzig metzen Gersten, geltes, vnd auf einer Hofstat gelegen ze Plockstorf da zu den zeiten des Schuester witib oufgesezzn ist, viertzig phennig geltes.——.||
Also mit ausgenomen worten, ist daz die vorgenant Margret mein Snver mit dem egenanten Otten meinem Svn chind gewinnet, darouf sullen nach ir paider tod die vorgenanten Gu^oter erben vnd geuallen. Wer aber daz derselb Ott mein Svn abgieng mi^et dem tod ee denne die vorgenant Margret mein Snv^or, vnd daz Si mit einander nicht Chind gewunnen, des Got nicht welle, oder ob Si Chind mit einander gewunnen vnd daz die auch abgiengen ee denne dieselb mein Snver, dennoch so sol Si die vorgenanten Gu^oter allew mit allen den nützen Ern vnd rechten, die darczu^o geho^erent, so vorgeschriben stet in nütz vnd in gewer innehaben vnuerchumert vntz an irn tod als margengab recht ist vnd des Lanndes recht ze O^esterreich, vnd denne nach irm tod so su^ollen die selben Gu^eter allew herwider erben vnd geuallen auf mich egenanten Weikcharten von Topel, oder ob ich nicht wer, darnach auf mein nechst Erben dar auf Si denne ze recht erben vnd geuallen sullen an allen chrieg. Vnd durich pezzer sicherhait setzen wir vns ich egenanter Weikchart von Topel vnd ich Ott vnd ich Stephan von Topel sein paid Sv^on vnd alle vnser Erben vnuerschaidenleich vber die vorgenanten Gu^oter vnd v^ober alles das das dartzu^o geho^eret so vorgeschriben stet, der oft genanten vrown Margreten mein egenanten Otten von Topel Hausvrown ze rechten gewern vnd Scherm für alle ansprach als aigens vnd margengab recht ist vnd des Lanndes recht ze O^esterreich. — —. Und daz Jr die Margengab furbas also stet vnd vntzebrochen beleib, Darüber so geben wir Jr für vns vnd fu^or alle vnser Erben den brief zu einem warn vrchu^ond der Sach versigilten mit vnsern Jnsigiln vnd mit Niclas insigil von Topel mein egenanten Weikcharts pru^oder vnd mit vnsers vettern Jnsigil hern Weykcharts von Topel vom Haws im pach vnd mit vnsers Öhems Jnsigil Hannsen von Plankchenstein die der Sach getzeugen sint mit irn Jnsigiln. der brief ist geben nach Christes gepurt Drewtzehen hundert iar dar nach in dem Sechs vnd Sybentzgistem iar an Sand Margreten tag der heiligen Junkchfrown.

Source Fulltext: OÖUB 9 (Wien 1906), S. 111-113