Jch Hanns der Zintzenstorffer, Chorherr ze Salzburg, Vergich offenlich mit dem brief,— —daz mich mein Genaediger Herr Her Pilgreim Erczbischof ze Salczburch Legat des Stüls ze Rom, — bezalt hat, alles des, des er mir schuldig gewesen ist, vncz auf hewtigen tag, — —, von welherlay sach daz her waer cho^emen, nichts ausze nemen, Vnd sol noch mag ich noch mein frewnt noch ander iemant von meinen wegen, fürbaz ewichlich, hincz im, hincz seinen freunden, noch hincz an der yemant von iren wegen, nichts mer ze sprechen noch ze vordem haben, — Vnd was ich dar vmb Purgen oder Vertröster gehabt han, die sag ich all dar vmb gaenczlich ledig, vnd los mit dem brief, Vnd ob icht ander brief fürbaz von der Handlung wegen, oder wider den brief fürchoemen, die süllen all töd sein, — Vnd daz das alles also staet — beleihe, dar über gib ich den offen brief, Versigelten mit meinem anhangundem Jnsigel. Dar zü der Erber Herr Maister Hanns Chorherr ze Pazzaw, vnd zu^o den zeiten Chanczler des Hof ze Salzburg, sein Jnsigel, zu^e einer pezzern gedaechtnüzz, vnd gezeugnüzz, der sach, durich meiner fleizzigen bet willen an den brief gelegt hat, —, dar vnder ich mich für mich, vnd für all mein freunde verpinde, —, alles das staet, — ze haben, —, daz an dem brief geschriben stet, Der geben ist ze Salzburch, do nach Christes gepurd ergangen waren dreu czehen hundert Jar, darnach in dem Sechs vnd Sibenczigistem Jare, an Mittichen vor sand Jacobs tag in dem Snit.

Source Fulltext: OÖUB 9 (Wien 1906), S. 120-121