Wir Albrecht vnd Leupolt gebru^eder von gotes gnaden Herczogen ze O^esterreich, ze Steyr, ze Kernden vnd ze Krain, Herren auf der Wyndischen Marich vnd ze Porttnaw, Grafen ze Habspurg, ze Tyrol, ze Phirt vnd ze Kyburg, Marggrafen ze Burgow vnd Lantgrafen in Elsazze. Bechennen vnd tun chunt offenleich mit disem briefe, Daz vnser getrewr lieber Haidenreich von Meissaw obrister Schenk in O^esterreich, mit vnserr gunst vnd gutem willen an sich gelediget vnd erlo^eset hat, von dem Edeln vnserm lieben O^ehem Graf Hainreichen von Schow^enberg vnser Behausung, Purg vnd Stat ze Weytra vmb Viertausent phunt vnd Anderthalbhundert phunt wienner phenning, Darumb Si des egenanten von Schow^enberg phant sind gewesen von weilent vnserm lieben Bru^eder herczog Ru^odolffen seligen vnd von vns . nach sag seiner briefe, die er daruber gehebt vnd vns widergegeben hat, Vnd dauon sullent vnd mugent hinnenthin der egenant Haidenreich von Meissaw vnd sein erben dieselben vnser behausung ze Weyttra, Purg vnd Stat mit gewonleichen zinsen vnd diensten vnd mit allen nu^eczen vnd Rechten, die darczu^o geho^erent, als die von alter herchomen sind, in eins rechten werenden phandes weis an abslag der nu^ecze von vns innehaben vnd niessen, als lang, vncz daz wir oder vnser erben, die von jn erlo^esen vnd geledigen mit den egenanten Viertausent vnd Anderthalbhundert phunden wienner phenning. Si sullent ouch an demselben Satz vnd phand vnser leut vnd gu^eter daselbs vnuerdorbenleich vnd vnwu^ostleich innehaben, Vnd sullent vns den Satz die Purg vnd Stat ze Weyttra, leute vnd gu^eter zu^e einer yekleichen zeit in dem Jar ze lösen geben vnd wider in antwurtten, Wenne wir die Losung an Si vordern mit dem egenanten irem gelte, an alles vercziehen vnd widerred vngeuerleich. Auch sullent si oder wer von iren wegen die egenanten vnser Purg vnd Stat innehat, vns vnd vnsern erben vnd nachkomen damite wartten vnd gehorsam sein, Vns vnd die vnsern darin vnd darauz ze lazzen vnd auch darinne ze enthalten wider allerma^enklichen nyemann auzgenomen, wenne vnd wie oft vns des not geschicht an allez geuer. Mit vrchund dicz briefs . Besigelt mit vnsern furstlichen anhangenden Insigeln. Der geben ist ze wienn an sand Jacobs tag, Do man zalte Von Kristes geburt dreuczehenhundert Jar vnd darnach in dem Sechs vnd Sibenczigisten Jar.

Source Fulltext: OÖUB 9 (Wien 1906), S. 121-123