Wir Fridreich von Gotes genaden . Pfallenczgraf. bei Reyn vnd Herczog in Bayern zc. Bechennen offenlich mit dem brief. Wann wir den Hochwirdigen vnsern gu^eten vreunt Hern Albrecht Pischolf ze Pazzaw^e . an sein vnd seins Gotzhaws stat. vnd die erbern beschaiden vnser sunder liben . den Purgermaister, den Richter vnd gemainlich sein bürger da selbs ains tails vnd vnsern getrewn Zachareisen den Hadrer. an dem andern tail. Vmb di chrieg . vnd misshelung di sich zwischen in . her . vncz auf den Hevtigen tag als der brief geben ist, vergangen . ganczleich vnd vreuntleich gesu^ent haben, so ist des gegen einander mit vnsrer Weisung . gu^et vrchu^end vnd brief besigelt. Vnd di Sv^enung dankchperleich mit ir stat habundem willen . von vns aufgenomen habent. Da von nach irr vleizzigen gepet vertrösten vnd besichern wir sev slechtleich . als redleich getaydingt ist. daz nv fu^erbas ain tail gegen dem andern ze baiden Seiten ir Helffar vnd dienar . von der sto^ezz aller sach vnd verlau^effner Handlung wegen . nymmer mer voderung . feintschaft. Hazz noch fro^emdung haben süllen . in dhainer weis vngeuarleich . War, oder wu^erd vnder in yemand . der di selben vnser bericht vnd sv^onung, verrukcht vnd nicht gantzleich staet hielt. dez wir in doch nicht getraw^oen, so palld wir daz dann mit warr chvndschaft begreiffen, vnd ermont werden, als oft daz geschiecht. So wellen vnd maynen wir ernstleich dar zw ze tu^en, vnd dem tail, der wider di bericht v^eber uaren vnd vngütleich geschehen ist. füdersam vnd geholffen sein . daz im daz benomen vnd abgelegt werd —. Mit vrchu^end dez briefes versigelt mit vnserm anhangundem insigel . Der geben ist ze Pu^orchhawsen an Pfincztag, vor sand Stephanns tag in dem Snit. Anno domini Millesimo . CCCmo Septuagesimo sexto.

Source Fulltext: OÖUB 9 (Wien 1906), S. 124-125