Jch Zachreis der Hadrar. vnd alle mein erben, Veriehen offenleichen —, Vmb die chrieg, stözz vnd misshelung . die der Hochwi^erdig fu^erst der Pischolf von Pazzaw^e vnd die erbern beschaiden . der Bürgermaister . der Richter . der Rat. vnd ander sein bu^erger gemainlich Reich vnd arm da selbs ains tails vnd wir an dem andern tail gegen einander heten .---, Welcherlay, wu^estung . Todsleg, prannt. schaeden oder beswswa^erung . ze baiden seitten . sich darvnder an leib vnd an gu^ot verlau^effen hat. Daz vns dar vmb der Edel vnd Hochgeporen fu^erst vnser genediger Herre Her ffridreich Pfallenczgraf bei Rein vnd Herczog in Bayern etc. mit einander vreuntleich liebleich bericht. vnd , gesu^ont hat auf ein ende, Mit der beschaiden, daz alle chrieg, stözz vnd misshelung zwischen vnser, ab vnd hin sind getrewleich angeuärde, Vnd daz wir vnd baidenthalben vnser Helffar vnd diener —. von aller vergangen sach wegen, — nichtz auzgenomen, —, inner Landes noch auzzer Landes —, dhain ansprach . haezz . noch veintschaft. — nymmer mer haben vnd nicht gewinnen sv^ellen weder mit recht noch an recht. Geistleich noch werltleich. Auzgenomen der Totslag der an Hern Andren den Grüber saeligen, vnd der schade, der an im vnd an seinen dienarn in den sachen beschehen ist, ob sein Havsfraw seinev chind, frewnt oder ander iemmant von iren wegen . vns . vnsers tails dar vmb zw^e spraechen oder an viellen, des sv^ellen di obengenanten vnser gegentail von Pazzaw^e. von vns gar vnenkolten beleiben angeuärd, Danne sunderleichen verzeihen wir vns aller der rechtten, di wir an dem Pu^orkchstall, genant der Erlstain gehabt haben, daz der vorgenant vnser . Herre . der bischolf veruangen, darauf ein Vest gepawt, vnd sich da pei eins Gv^etz, haizzt Rau^et vnderwunden hat, dazselb Purkchstall, vest vnd gu^ot mit irem zw^e geho^eren allen ern rechten vnd nuczzen —, di wir dar auf vnd zw^e gehabt haben, sv^ellen nv^e hin fu^er aigenleichen einem yegleichen bischolf ze Pazzaw^e vnd seinem Goczhaws — ewichleich beleiben, —, Also, daz ich egenanter Zachreis Hadrer mein Hausfraw^e vnd vnser erben, noch ander niemant von vnsern wegen da hin künftichleich nicht mer voderung, zw^e versicht noch rechtens haben sv^ellen, Vnd ob yemand anderr hincz dem selben Pu^orkchstal, vest vnd güt, oder hincz irem zw^e geho^eren icht ze sprechen vnd ze reden hiet oder gewu^enn . dar vnder sv^ellen wi^er stille siczzen, so daz wir dem selbigen, desselben chrieges vmb daz oben genant Purkchstal, vest vnd gu^et, wider einen bischolf ze Pazzaw^e, sein Gotzhaws, noch wider sein bu^erger da selbs . dar zw^e noch darin ninndert helffen noch sterkchen su^ellen, in dhainerlay weis an gevard. Vnd ob icht brief . oder vrchu^end her fu^er chamen, von vnsern wegen, gelesen oder gezaigt wu^erden di dem vorgenanten vnserm Herren dem bischolf ze Pazzaw^e, seinem Goczhaws, der Stat, oder den bu^ergern da selbs oder andern den iren von vnsern wegen in den egenanten taydingen . vnd bericht geschaden möchtten . oder ze swarung ka^emen, wie oder wo sich daz fu^egt . di süllen alle ab . tod . vnd fu^er nichtew sein, vnd weder chraft noch macht nicht mer haben in dhainer weis. Mit vrchu^ende dez briefs . besigelt ist mit meinem Zachereis dez Hadrer anhangundem insigel. — —. Vnd zw einer gezeugnu^ezz mit dez ersamen weisen Hern Jo^ergen dez Aheymer insigel, den wir dar vmb gepeten haben. —. Der brief ist geben . an Pfincztag vor sand Stephans tag in dem Snit, nach kristus gepu^ert Drewczehen Hv^endert Jar darnach in dem Sechs vnd Sibenczigistem Jar.

Source Fulltext: OÖUB 9 (Wien 1906), S. 125-127