Ich Hanns Awer vergich, —, daz mich der Erwirdig Fürst mein genaediger Herr Her Pilgreim Erczbischof ze Salzburch Legat des Stüls ze Rom alles meines Soldes, Pfantlös, Pfaerd vnd Schaeden, wie daz allez genant mag gesein, daz er mir für all sach, nichtz aus ze nemen schuldig gewesen ist, vncz auf den hewtigen tag gaentzlich ausgericht vnd fürderlich an allen meinen schaden bezalet hat, Also daz ich, mein Erben noch ander yemand von meinem wegen, hincz meinem Egenanten Herren von Salzburch seinem Gotzhaus vnd seinen nach chömen noch hincz allen den iren, vmb dhainerlay sach, wie die genant möchten sein, nichtz auszenemen, di sich verlauffen habent vncz auf den hewtigen tag nichts mer zu vordem noch zu sprechen haben sol noch mag in dhainer weis an geuaer. Vnd dar über ze ürchund gib ich den offen brief versigelten mit meinem aigen anhangundem Jnsigel, dar vnder ich mich verpind staet ze haben allez daz, daz an dem brief verschriben ist, Der geben ist ze Salzburch an freytag vor sand Veytstag Nach Christes gepurd dreu czehen hundert Jar, darnach in dem Sechs vnd Sybenczigistem Jare.

Source Fulltext: OÖUB 9 (Wien 1906), S. 84