Jch Hainreich der Graesler, puriger ze Salzburch, mein Hausfraw vnd all vnser eriben, Veriehen — — das wir — — ze chauffen haben geben, dem Ersamen Herren Hern Berichtolden dem Losenstainer, ze den Zeiten Chorherr vnd pharrer ze Salzpurch vnd sein nachchomen. Ain Burchrecht. Haus vnd Hofstat. das gelegen ist ze Salzburg, in der Huontsgazzen ze nachst an dem haus. das der Tryenkchlinn was. vnd pei werntzleins des prieftrager haus saeligen, vnd das egnant purchrecht haben wir in geben vnd ingeantwuort. aus vnser nuetz vnd gewer in deu ir als wirs vnd vnser uodern inne gehabt vnd herpracht haben. an geuerd. vnd habent vns auch das selb Haus vnd Hofstat genczleich vergolten nach allem vnserm willen vnd an allen schaden, das wir vns sein ewichleich verzigen haben — — Vnd haben in es auch aufgeben vnd Richtig gemacht mit Gerichts hant Chuenrat des Taufchintz di zeit Richter ze Salzburg, also purchrechts recht ist vnd der stat da selben. gewer vnd fürstand Vnd ze ainem vrchuent der warhait geben wir in den prief versigelt mit des vorgnanten Erbern mans Chunratz des Taufchinds Richter ze Salzburg anhangunden insigel — —. Der Sache sind zeugen vnd taydinger gewesen die Erbern Herrn Her Hans der Hawsler, Chorherr ze Salzburg, Her Eberhart Tagmezzer, Her Dietreich Chapplan. vnd Her Larentz Spitaler vnd gesellen der pharr da selben. vnd Vlreich der Wechslaer vnd maister Ott der Smyd. puriger ze Salzburg vnd ander Erber läutt. Der prief ist geben an sant Philipps vnd sant Jacobs tag nach christi gepurd 1376.

Source Fulltext: OÖUB 9 (Wien 1906), S. 77-78