Ich Hanns von Trawn, zden zeyten hawptmann daez der Vreinstatt, vergich vnd tun chunt allen den die den prieff sehent, ho^erent oder lesent, dy nu lebent oder hernach noch chünftig sind, das der Erber priester her dyetreich, der pfarrer dacz heresing einen bryff für mich pracht, der(!) mein Vater säliger gegeben hat vnd sich in der lavtt also anhebt: folgt der Gabbrief Hartneyds von Traum über die widern zu Ofthering, Hausleiten, Kirchstetten, Lintenloch und Topel de 1320. 3. X. (St. Cholmann).||
Dar zü han ich vorgenanter Hanns von Trawn mit aller meyner erben Rat, gunst vnd willen zu einer Widerlegung der Mess, dy ich in mein stifft und Chajpelen in meyner vest ze Trawn gestuft han, der pfarrchirchen vnd dem pfarrer dacz Heresing, wer pfarrer da ist. gewidmet vnd gegeben han, meyns rechtens vreyn aygens, dy guter, dy her nach geschriben stend: Des ersten dy hoffstatt ze Heresing vor dem obern Vreythoff tör gelegen, gein den Vreythoff über, da dy wünderlinn dy zeit aufgessessen ist, da man dint alle Jar Jerleich fümf vnd vyrczikh pfenning. Vnd da selbs gelegen der halb wurmhoff da man von dint alle Jar Jerleich fümfzehen meczen Chorns vnd newn meczen habern vnd für swein fümf vnd vyrczik pfenning, zway huener, Ain gans, ze Ostern dreizzik ayer, zwen chäs für vier pfenning, ze pfingsten dreizzik ayer vnd zwen chäs für vier pfenning, ze weynachten zwen chäs für vier pfenning vnd prot auch vmb vier pfenning. Ze Päsching pey dem pach ein hoffstatt, dynt drey schiling pfenning vnd zwen chäs vmb vier pfenning, dreizzik ayer, zway hüner, Dew egenanten widern vnd auch dy güter, dew ich ze Widerlegung der pfarr vnd dem pfarrer gegeben han, süllen alle dynen der egenanten Pfarr vnd dem pfarrer, wer pfarrer ze Heresing ist, in aller der mazz als vorgeschrieben stett, dar vmb daz derselb pfarrer dacz heresing seynen willen vnd gunst dar zü geben hat, daz der Cappellan der Cajpeln ze Trawn, wer der ist, oder wirt, alle pfärleiche recht, begen vnd volfüren sol gänczleichen hincz allen den, dew ze Trawn in vnserr vest innerthalben der Graben wanung habent vnd hewsleich gesessen sind, ausgenommen der begrebnuzz, dew sol sich dacz der rechten pfarr dacz Heresing alle da vergen. Es sol auch der oftgenante pfarrer dacz Heresing stiften vnd stören auf allen den wydem vnd Güetern, dew wir, Jch vnd mein vadern, dem Oftgenanten Goczhaws dacz Heresing geben haben in aller der mass, als anderr herren auf iren Gütern recht habent, Vnd sind auch dew läwtt, alle, dew auf den obgeschriben Guetern sind gesessen, sein behawst holden. Jch vorgenanter hanns von Trawn vnd alle mein erben bestättigen dem oftgenanten Goczhaws vnd der pfarr dacz Heresing vnd auch dem pfarrer da selbs, wer der ist, dew wydem vnd dew Gueter, die ich ze Widerlegung geben han, allew, vnd pin auch ich vnd mein erben oder wer Trawn, mit recht, inn hat, der selben Gueter, herr, vogt vnd gewer, Also daz wir dy vogten vnd getrewleich schirmen süllen, an alle gab vnd myet, ausgenomen des gewöndleichen vogtrechcz, daz sol vns geuallen Jerleich an alle widerred. Vnd daz die, dew stiftung vnd dew widerlegung vnd auch alle die handlung, dew paid Bryff lawtten vnd sagent, also Ewichleichen, statt vnd vnczebrochen beleiben, dar über gib ich, oftgenanter Hanns von Traun vnd mein drey sün, Lewpolt, Hertneyd vnd Hanns, geprüder von Trawn, dem oftgenanten goczhaws vnd der pfarr dacz Heresing zu einem waren vrchunde den Bryff versigelten mit vnsern vier anhangunden Jnsigeln, der geben ist nach Christi gepürd Tawsent Jar, drewhundert Jar vnd in dem Sechs vnd Sybenczik Jar an sand Philipps vnd sand Jacobstag der heyligen zweliffpoten.

Source Fulltext: OÖUB 9 (Wien 1906), S. 78-80