Ich Görig der Rüdlinger vergich vnd tün kunde offenbar mit dem brif allen den di in sehen oder hören lesen, di nu leben oder hernach chünftig sind, Vmb di chlag sa der Edel erber Herr Her Eberhart von Chajpellen der Elter über mich tan hat, meinem genedigen lieben Herren Hern Hainreichen von Waltse ze den zeiten Haubtman ob der Enns, vnd dar vmb mich mein egenanter Herre von Waltse in seiner venkchnu^esse vnd pessrung gehabt hat, dar aus mich mein vreund vnd erber la^ewt erpeten haben. Also dass ich nach alle mein vreund vnd Helffer gegen dem obgenanten meinem Herren von Chajpellen vnd dem von Waltse vnd gegen alle den di mit wart vnd mit werchen an der ebenanten meiner venkchnuss vnd pezzerung schuld haben dhain veintschaft, has, vnwillen nach scheden zü ziehen nach gegen in haben schullen vil nach wenig in dhainen wegen an geuerd. Auch ist sunderlich ze merkchen das ich egenanter Ru^odlinger alle mein vreu^onde vnd Helffer nach niemant von vnsern wegen gegen den obgenanten meinen Herren dem von Chajpellen, vnd dem von Waltse vnd alle den iren von der ansprach vnd chlag wegen, sa ich hab hintz den iren dar vmb mit in nach den iren nichtz ze schaffen nach ze handeln sollen haben, denne mit dem rechten vnd der vorgeschriben gelub vnd gehaiss hab ich geswaren ainen starkchen ayd hintz got vnd allen seinen Heiligen, daz ich vnd alle mein vreund vnd helffer das sta^et vnuerrukcht vnd gentzleichen behalten wellen mit vnsern trewen an aller arig liste der selben gelub vnd gehaiss ze pezzrer sicherhait vnd versarignusse setz ich in ze sampt mir ze parigen mein lieb vreund vnd gesellen di mit namen an dem brif verschriben sind vnd ire Jnsigel an dem brif ze zewgnusse gehangen haben, von erst Her Wernhart, Her Dietreich di Aystershaimer, Her Jörig von Volkestorff, Her Hanns Ma^ewrly, Her Andre von Pollnhaim, Herr Veyt der Anhanger, Herr Jacob Strahner, Herr Hainreich Scho^ennawer, Lewtolt Aespein, Wolfhart vnd Haensel di Sintzendorffer, Vlrich Aschperger, Örtel Gaewmann, Wernhart Chamrer ze Lincz, Hainreich Perkchaimer, Allweyg Ru^odlinger, Lewtolt Holczer, Thoman Aczpekh von Holczhaim, Vlrich Moser, Chonrad Steger, Goschel Lerbüchler, Stephel Chersperger von Stadelchirchen, Hanns Ponhalben aus der Ta^enn, Vlreich Aettel, Thoman Alhartinger, Hanns Schifer, Hainrich Schönnawer von Aterse, Alram vnd Ludweig Vettern die Chamrer, Fridrich Mitterekker, Hanns Grüber, Hainrich Aistershaimer Hern Wernharts des Aistershaimer brüder, Dyeterich Tew^orbanger von Chrotendorf, Meinhart Tew^erbanger, Alphart Hörenpekch ze Welss, Örndl Bernawa^er, Vlrich Geltinga^er, Vnd dar nach aber setz ich dar czu^o ze pargen mit sampt vns vnser lieben vreund, vnd gesellen, als sew mit namen her nach auch verschriben sind vnd nicht aigen Jnsigel haben, von erst Fridrich Förster, Jacob Chirichperger, Hanns Jöriger, Herrn Vlrichs sun von sand Jörigen, Fridrich Law^on, Vllrich Aboltinger, Ha^ensel Schernhaimer, Johel Pernaw^oer, Also beschaiden vnd mit warten aus genomen, Ob ich ofgenanter (!) Jörig Rudlinger mein vreund vnd helffer, das in dhainer Weis vberfueren, des wir von erben laewten wizzentleichen über weyset würden, So bin ich vorgenanter Jörig Ru^odlinger vor aus veruallen leibs vnd güts an alle gnad, vnd mein ebenant pargen, als sew vorbenannt vnd geschriben sind veruallen meinem Herren zwaier Hundert phunt wyenner phenning, der ye der man seinen tail, sa in aus den zwain Hundert phunten angepürd, geben sol, wenn man den an in vodert, wer oder welich aber des nicht tet, waz man des schaden nimpt, den sol man haben dacz dem selben vnd auf aller seiner Hab, wie die genantt oder wa di gelegen ist, da von man denne desselben seins tailes vnd der scheden, sa man dar von nimpt, bechomen sol vnd mag mit gu^etleichem seinem willen vnd wart. Darczu^o sollen wir vorbeschriben pargen alle dem oft genannten Jöriglein dem Ru^odlinger oder welher sein vrewnd oder helfer der gelu^ob vnd gehaiss pru^ochig wu^erd, als veint sein vnd nach seinem Leib vnd Gu^ot trachten vnd vlaizzichleichen dar nach setzen . Das wir in darczu^o bringen, das das gegen im volfürt werd, das an dem brif beschriben vnd begriffen ist, Vnd der vorverschriben red vnd tayding ze Vrchu^ond gib ich egenannter Jörig Ru^odlinger vnd wir vorbeschriben Pargen alle di aigen Jnsigel haben, als wir vor benant sein, den brif offenbaren mit vnsern anhangunden Jnsigeln besigelten, dar czu^o auch wir vorbenannt pargen alle beschrieben mit namen, di nicht Jnsigel haben, vns verpinden mit vnsern trewn vnder der obgenannten aller Jnsigel, sa an dem brif hangen vnd geloben auch genczleihen stet haben vnd volfueren an alles geuerd, alle gelüb, pünd vnd haizzen vnd mit ze gelten als an dem brif geschriben stet. Der brif ist geben an Phincztag vor sand Nyclastag, Nach Christi gepurde Dra^ewczehen Hundert jar dar nach in dem Sechs vnd Sybenczkistem jar.

Source Fulltext: OÖUB 9 (Wien 1906), S. 174-176