Wir Lampreht von gots gnaden .Byschof. vnd wir Heinrich Techant. Vlrich von Tünfelt Schulmeister vnd daz Capitel. gemeinklich ze Bamberg . bekennen offenlich mit disem briefe . daz wir mit wolbedachtem mu^et vnd mit gutem rat . durch sichtiges vnd ku^entlichs nu^eczes willen vnser vnd vnsers Gotshaus dauor benant. vns mit gutem willen vereint, vnd besampt haben . daz wir verkauffen wollen vnser vnd desselben vnsers Gotshaus . vesten . Slozz vnd gu^ot . Frankemburg . Fridbu^org, Atersee . vnd dy Hof mark Osterhouen . mit allen iren zu^ogeho^ern . rehten vnd freyungen . wy dy genant sein mit einander oder besunder . Also . ob daz geschicht . daz dy vorgenant gut also verkauft werden . was denn/e gelts vns vnd vnserm Gotshaus dauon sol oder mag geuallen oder geuellet . dasselb gelt sullen von vnsers vorgenanten Byschoff Lamprehtz wegen . vnd an vnserer stat emphahen vnd einnemen vnser lieben andechtigen Berthold von Hennberg, Johans Zufrazz Probst zu sand Stephan . Tu^omherren ze Bamberg. vnd von vnsers vorgenanten Capitels wegen . dy . erbern Herren Her Dittreich von Abensperg vnd Her Vlrich von Tu^onfelt Schulmeister . auch Tumherren ze Bamberg. vnd dy vier su^ollen dasselbe gelt mit einander mu^e vnd zu^o gewalt haben . alz lang vncz wir vorgenant Byschof vnd Capitel ze rat werden vnd vberein kumen gemeinklich oder der merer teil vnder vns . wy^e wir dasselb gelt vnserm ebenanten Gotshaus ze nu^otz vnd ze fru^emen anlegend werden. vnd wir Lampreht Byschoff noch vnser nachkomen noch wir daz Capitel dauor benant su^ellen noch wollen noch nymant an vnser stat. noch von vnsern wegen dy egenanten vier noch ir keinen hindern noch irren . an dem egenanten geld . noch daz nymmer beru^eren . noch ein nemen in dhein weis/e, su^ender sy sullen daz haben alz lang vntz daz geschiht als vor stet geschriben . doch sol man des selben gelts . als uil man dez bedarff legen an dy pfantschaft alz wir Stu^effemberg vnd andere gut inn haben von Grafen Heimo von Tru^ohendingen vnd seinen Erben. Wurd denn derselbe von Truhendingen oder sein Erben dyselben vesten vnd gu^eter lo^esen, dasselbe gelt daru^emb dann wirdet gelo^eset. su^ellen aber dy vorbenanten vier einnemen . vnd daz innhaben alz lang vnd in aller der weys, alz vor stet geschriben . Wer auch daz der vorbenanten einer oder sy beid . dy wir der Byschoff dar zu^o haben geben, abgiengen . oder in dem Land niht wen(!) zu den zeiten, so daz vorgenante gelt solt oder mo^eht geuallen . So mu^ogen wir vnd vnser Nachkomen einen oder zwen auz dem Capitel an derselben stat dar zu^o geben . dasselb mu^ogen auch wir von dem Capitel tu^on . gleicher weys/e ob wir dy. dy. wir darzu geben haben niht mo^ehten gehaben . vnd di selben su^ellen denn aber daz gelt inn/e haben in aller der weys/e . als vor stet geschriben . vnd wir Lampreht Byschoff dauorbenant bekennen an disem brife, daz wir alle Stu^eck vnd artikel alz sy hieuor an disem brif stent geschriben vnd ir iglichen besunder sullen vnd wollen getrewlich halten an geuerd . vnd dez haben wir vnser trew gegeben vnd dez zu^o den Heiligen gesworn . vnd zu^o merer sicherheit haben wir gebeten . vnser lieben andechtigen den : abt vff dem Mu^enchperg vnd ander Stifte. ze Bamberg zu^o sand Stephan, zu^o Teurstat vnd zu^o sand Jacob . daz sy zu^o gezeugniffs irer Capitel Jnsigel zu^o vnserm an diesen brif haben gehangen . vnd wir Otto Abt uff dem Mu^enchperg . vnd wir Johans . zu^o sand Stephan . Heinrich zu^o Teurstat, Conrad zu^o Sand Jacob. Techanite. vnd alle Chorherren . der vorbenanten Stift gemeinklich vnd besunder bekennen an disem brife daz wir du^orch dez vorgenanten vnsers Herren des Byschof von Bamberg bet wi^ellen vnserer Capitel Jnsigel an disen briff zu^o gezeugnuss haben gehangen . vnd wir Heinrich Techant vnd daz gemein Capitel dez Stifts ze Bamberg dauor benant bekennen an disem brife daz wir auch alle Stuck vnd artikel als sy dauor von wort zu wort stent geschriben . vnd ir iglichen besunder sullen vnd wollen getrewlich halten . vnd haben dez vnsere trew gegeben . vnd zu^o den Heiligen gesworen . vnd zu^o einer merer Sicherheit haben wir vnsers gemeinen Capitels Jnsigel zu^o unsers Herren von Bamberg vnd mit der vorbenanten Stifte Jnsigel an disen briff gehenkt. der geben ist ze Bamberg nach Cristi gebu^ort Drewczehen hundert Jar vnd in dem sehs vnd Sybentzigstem Jare . am donrstag vf sand Barbarentag.

Source Fulltext: OÖUB 9 (Wien 1906), S. 172-174