Jch Wylhalm von Glanekk, Vergich —, Das ich mich gancz vnd gar verebent, vnd verrichtet han mit den Erbern Herren Hern Rüdolfen von Waltse die zeit Houbtman in Steyr, mit Hern Reymprechten vnd Fridreichen von Waltse seinen Pru^edern vnd mit irn Erben, vmb alle die recht, die ich vnd mein Erben gehabt haben, an dem Erb Druchsecz ampt in Steyr, das Lehen ist von vnsern Herren den Herczogen ze Österreich, —, Also daz Si mir fu^er alle die recht, die ich vnd mein Erben, an demselben Ampt vnd seiner zugeho^erung gehabt haben, gegeben habent Hundert phunt wienner phenning, —. Vnd dar vmb so han ich an mein selbs vnd aller meiner Erben stat, —, vnd mit meins Lehen Herren Hannt des Hochgeborn fu^ersten meins gnedigen Herren Herczog Albrechts ze Österreich, ze Steyr, ze Kernden, vnd ze Krain, Graf ze Tyrol etc. mich aller der rechten, so ich vnd mein Erben an dem vorgenanten Druchseczen ampt vnd an aller seiner zugeho^erung gehabt haben, genczlich verczigen, — —, Vnd dar u^eber, so gib ich Jn den brief fu^er mich vnd fu^er alle mein Erben, zu einem warn vrchu^end der Sach, versigilten mit meinem insigil vnd mit des edlen Herren insigil Graf Hermans von Cili, vnd mit Hern Weykharts in¬sigil von Pollnhaym, die ich des vleizzichleich gepeten han, daz Si der Sach geczeugen Sint mit i^ern insigiln, angehanngen, Der brief ist geben ze Wienne nach Christes gepu^ort, Drewtzehen hunder tiar darnach in dem Syben vnd Sybenczgistem iar, des nechsten Svnntags vor Mitteruasten +

Source Fulltext: OÖUB 9 (Wien 1906), S. 209-210