Ich Ott der Obernholtzer vnd ich Agnes sein Hausurow vnd alle vnser Erben, Wir vergehen vnd tu^en kunt allen den, die den brief lesent, oder ho^erent lesen, die nv lebent vnd hernach ku^enftig Sint, das wir mit gutem willen, mit wolbedachten mu^ot, mit gesambter hannt vnd nach rat vnnserr frewnt zu der zeit, do wir es wol getu^en mochten, verchoufft haben vnser vesst ze obern Raewt, die Lehen ist von den Erbern Herren von Chappell, vnd alles, das dartzu^o geho^eret, vnd alles das, das wir daselbens ze obern Raewt gehabt haben, das von den von Chappell Lehen ist, Es sey Holtz, Weinga^erten, weintzehent, getraidtzehent, Holden, Aekcher, Wismat, ze ueld vnd ze dorff, gestifft vnd vngestifft, versu^echt vnd vnuersu^echt, wie das genant iat, dartzu^e haben wir verchoufft alles, das wir daselbens ze obern Raewt gehabt haben, das Lehen ist von dem Bischof ze Pazzow, wie das genant ist, vnd alles das, das wir daselbens ze obern Räiwt gehabt haben, das Lehen ist von den Erbern Herren von Meyssow, wie das genant ist, die vorgenanten vesst ze obern Raewt vnd alles das, das dartzu^e geho^eret vnd alles das, das wir daselbens ze obern Raewt gehabt haben, als vorgeschriben stet, haben wir mit der rechten Lehenherren Hannden, Recht vnd redleich verchoufft vnd geben mit allen den nu^etzen vnd rechten, als wir es alles in lehens gewer herpracht haben, vmb Hundert phunt, vnd vmb vier vnd zwaintzig phunt Wienner phenning, der wir gantz vnd gar gewert sein, dem Erbern Wutzkchen dem Harrocher vnd seinen Erben fu^erbas ledichleich vnd vrey^eleich zehaben vnd allen irn frömen damit zeschaffen, verchouffen, versetzen vnd geben, wem si wellen, an allen irrsal vnd sein auch wir vnd alle vnser Erben, vnuerschaidenleich, der egenanten Vesst ze obern Raewt, vnd alles des, das dartzu^e geho^eret, vnd alles des, das wir daselbens ze obern Raewt gehabt haben, als vorgeschriben stet, des egenanten Wutzken des Harrocher, vnd seiner Erben, Recht gewern vnd Scherm fu^or alle ansprach, als Lehens recht ist vnd des Lanndes recht ze Osterreich. Wer aber, daz Si an denselben gu^etern icht chriegs, oder ansprach gewunnen, von wem das wer, mit recht, Swas Si des schaden nement, das fu^ollen wir jn alles ausrichten vnd widerchern an allen irn schaden, vnd süllen Si das haben auf vns vnuerschaidenleich vnd auf allem vnserm gu^ot, das wir haben in dem Lannde ze O^esterreich oder wo wir es haben, wir sein lebentig, oder tod. Vnd das der Chouf fu^erbas also stet vnd vntzebrochen beleib, daru^eber so geben wir Jn den brief zu einem warn vrchu^end der Sach versigilten mit mein obgenanten, Otten insigil des Obernholtzer vnd mit meiner O^ehemen insigiln Albers von Pyrbawn vnd Vlreichs des Tewfels von Engelmarspronn, die wir des vleizzichleich gepeten haben, daz si der Sach getzeugen sint mit irn insigiln, jn an schaden . der brief ist geben nach Christes . gepu^ert Drewtzehenhundert iar, darnach in dem Syben vnd Sybentzgistem iar des nechsten Sonntags vor mitteruasten +

Source Fulltext: OÖUB 9 (Wien 1906), S. 206-208