Ich Vlreich auf dem Stadel aigen . vnd mein Hawsfraw. vnd mit sampt vns alle vnser erben wie die genant sind, si sein gegenwu^ertig oder chunftig, Daz wir mit wolbedachtem mu^et mit gunst vnd willen aller vnser erben zder zeit vnd wir daz mit recht wol getu^en machten recht vnd redleich ze chauffen geben haben vnser gu^et auf dem Stadel aigen genant, da wir auf gesezzen sein, gelegen in der pharre daz sand Marein, daz freyes aigen ist, dem erbern manne Petrein dem Pawern purger ze Steyr seiner Hausfrawn vnd allen iren paiden erben, Wie die genant sind vnd haben in auch dasselbig gut gegeben aus vnser nutze vnd gewer in ir nutze vnd gewer mit allen den rechten vnd nutzen die darzu^e geho^erent vnd da von bechömen mugen ze Holtze ze velde ze wismad ze wazzer ze waide ez sei gestifft oder vngestifft gepawen oder vngepawen, wie daz alles genant ist versu^echt vnd vnuersu^echt vnd auch in allen den rechten, als ez von alter her cho^emen ist, vmb ain gelt, dez si vns gancz vnd gar gericht vnd gewert habent, Also beschaidenleich, daz wir noch alle vnser erben hincz demselben gu^et nimmer dhain zu^espruche noch ansprach haben noch gewinnen sullen, weder mit recht noch an recht. Vnd tu^en vns auch dez aller sache genczleich vnd gar mit dem prief ze fu^erzicht. Wir sullen vnd wellen auch desselben gu^ets ir recht gewern sein, wo in dez no^et vnd durft geschieht nach dem Lants recht als freyes aigens recht ist in dem Lande ze Osterreich ob der Enns. Na^emen si dar vber von der gewerschaft wegen mit recht indert dhainen schaden, wie derselbig schad genant wu^orde, den si oder irr erben ainer pei iren trewn an aide gesprechen mugen, denselben schaden sullen wir gancz vnd gar in ablegen, vnd wider cheren an alle wider rede vnd sullen auch daz haben dacz vns vnd vnsern trewn . vnd dar zu^e datz aller vnser hab vnd wir haben, wo wir die haben inner lants oder awzzer lants auf wazzer oder auf lande versu^echt vnd vnuersu^echt vnd desselben schadens da von becho^emen an chlag furbot vnd recht so si nachst mugen mit vns vns (!) vnd vnser erben gu^etleichem willen, wir sein lembtig oder tod. Daz die rede furbas staet vnd vnuerchert beleib . dar vber gib Jch Vlreich auf dem Stadel aigen Petrein dem Pawern vnd seinen erben den prief zu ainem waren vrchunde der Warhait versigilten mit der edeln meiner genedigen Herren Hern Hertneyds von Losenstain vnd mit Hern Jo^ergen von Volchenstorf anhangunden Jnsigiln die wir dez vleizzig gepeten haben daz si der sache mit iren Jnsigiln getzewgen sind an schaden, vnd verpint mich auch obgenanter Vlreich mit sampt meinen erben vnd iren Jnsigiln alles das an dem prief geschriben stet staet ze halten mit vnsern trewn an alles geua^erde. Geben nach Christi gepurde Drewtzehen Hundert Jar dar nach in dem siben vnd Sibenczgisten Jar dez phintstags vor mitter vasten.

Source Fulltext: OÖUB 9 (Wien 1906), S. 211-212