Ich Stephan der Strazzer vnd ich Anna sein Hausvrow vnd vnser paider erben, wir vergehen offenlich —, vmb di Güter dacz dem Dyeppolcz gelegen in Harresser Pharr, do mein Herren Her Eberhart von Chajpellen vnd Her Wenczla von Chappellen iehent, si sein von in ze lehen vnd da ich wil, sy sein aigen vnd di vierdhalben Mut waicz dienen vnd drew phunt vnd drey schilling phenning gelts dienen, da habent di erbern Herren zwischen vns alz verr geret, der edel Herr Graff Pürchart von Maydbu^orkch vnd Her haidenreich von Meyssaw vnd Her Hainrich von Walsse ze der zeit haupman ob der Ens, daz ich mein Herren von Chajpellen, ich oder mein erben weysen schu^ollen inner iares frist, nach dez Landez recht ze Österreich, daz es vnser aygen ist, als weysens recht vmb solich sach ist. Tu^on ich dez nicht, in der zeit, so schol ich oder mein erben, ob ich nicht enwer, vnsers aygens alz vil geltz vnd alz guten gelt von in ze lehen nemen, als dez obgenannten geltes ist, daz vorgeschriben stet. — — (Geschieht dies nicht, hat er oder sein Erben mit 2 erbarn Knechten vnd 2 Pferden »gen Haedersdorf in irn Markt« in ein offen Gasthaus zu laisten.) — — Vnd dez zu vrchund geben wir in den offen prief versigelten, ich obgenanter Stephan der Strazzer mit meinem anhangundem insigel, darczu han ich gepeten den vorgenanten edeln vnd erbern meinen genedigen Herren Graff Pu^orcharten von Maidburkch, daz er der sach getzewg ist mit seinem anhan¬gundem insigel im vnd seinen erben an schaden. Der prief ist geben nach Christi gepurd Drewtzehenhundert jar, darnach in dem Siben vnd Sibenczigistem jar dez freytags vor dem Palmb tag.

Source Fulltext: OÖUB 9 (Wien 1906), S. 222