Ich Chunrat der Haewzz von Prawnaw zu den zeiten des Erwirdigen Herren des Abbts von Melkch Schreiber vergich — daz ich — mit des Erbern Mans Hant Wernharts des Schorn zu den zeiten Richter vnd Pergmaister in der Mawr, des Erbern Herren Hern Chadolts von Ekchartzow des Eltern verchouft hab meins rechten Chowfguts, daz ich vmb mein ledigs Varund gut gechouft han, mein zwen Weingarten paid gelegen in der Mawr, ainer an dem Chrewtzperg, des ein halbs Jeuch ist ze nachst Mathes Weingarten des Wolfhierns, do man von dem egenanten Weingarten alle Jar dient dem vorgenanten Herrn Kadolten von Ekchartzow einen Emmer Weins ze Perchrecht, vnd drey Pfenning ze Witrecht (sic), vnd nicht mer, So leit der ander Weingarten an dem Chadoltzperg, des ein halbs Jeuch ist, ze nachst Michels Weingarten des Selden, do man von dem egenanten Weingarten auch alle jar dient dem egenanten Herrn Kadolten von Ekchartzow ainen Eimer Weins ze Perchrecht, vnd drey Pfenning zu Voitrecht (sic) vnd nicht mer, die vorgenanten zwen Weingarten han ich — verchowft — mit allen den nutzen — als ich sie vnuersprochenleich in Perchrechts gewer herpracht han — vmb zway vnd dreizzig Phunt Wienner Phenning — dem Erbern Manne Philijpen dem Chramer ze Wienne, vnd seiner Hausvrown Vrown Chunigunden vnd ir paider Erben — vnd pin auch ich obgenanter Chunrat der Haewzz vnd all mein Erben — der vorgenanten zwaier Weingarten des egenanten Philijps des Chramer, Vrown Chunigunden seiner Haus Vrown vnd Jr paider Erben recht gewern vnd Scherm — als Perchrecht recht ist vnd des Lanndes Recht ze Österreich. — — Vnd daz der Chouff furbas also stet vnd vnzebrochen beleib, vnd wannd ich obgenannter Chunrat der Haewzz selber nicht aigens Jnsigels han, darumb so gib ich Jn den Brief zu einer warn Ürchund der Sach versigelten mit des Obristen Perchherren Jnsigil, des vorgenanten Herrn Chadolts von Ekchartzow vnd mit des Erbern Mans Jnsigil Wernharts des Sleyher Pürger ze Wienne, die ich des vleizzichleich gepeten han, daz Si der Sach geczeugen sind mit irn Jnsigiln. — Der geben ist ze Wienne nach Christi Gepurde 1377 isten Jare an vnser Vrowen Abent ze der Liechtmesse. E duobus Sigillis alterum deest.

Source Fulltext: OÖUB 9 (Wien 1906), S. 192-193