Ich Rudolff von Waltse di zeit Hauptman in Steyr vnd mein Erben veriehen —, daz wir vnserm holden Chunraten Hainreichs su^en am Chienperg seiner hausfrawn allen iren Erben vnd gaben di^e vns nu^ocz vnd fu^egleich sind ze holden ain rechtz chaufrecht geben haben auf dem Hoff am Chienperg vmb ain gelt das si vns gancz vnd gar gericht vnd gewert habent, also daz wir sew dar auff nicht verchern schu^ollen all di weil si vns daz verdienn vnd verstewrn mu^egen. Si schullen vns auch alle jar da von dienen dreyczehn schilling wienner phenning an vnser frawentag zu der dienst czeit vnd sullen auch vns mit aller vo^erdrung berait sein als ander vnser Holden vnd wann sie den selben Hoff verchauffent, so sollent si vns geben den zehentten phennig an geuer, waz man in daru^emb geit vnd wer dar auf vert, der sol vns geben sechtzich phenning ze anlait. Stirbt aber vnser Holden ainer dar auf, so sollent vns sein Erben geben sechtzich phening für Todhaupt vnd sechtzich phenning ze anlait vnd nicht mer. Dar über geben wir in den pri^ef versigelt mit meinem anhangundem Jnsigel, Geben ze Sewsenek am freitag vor dem Suntag wann man singt Reminiscere, Nach Christez Geburd Dreuczehen hundert jar, darnach in dem Syben vnd Sybentzigistem jar.

Source Fulltext: OÖUB 9 (Wien 1906), S. 201