Ich Hertneid von Pettaw der jüngere, an aim tail vergich —, vmb alle die chrieg, ansprach vnd vordrung, So mein liebew muem Ann von Liechtenstain, Hern Friedreichs von Pettaw, meins Vettern seligs tochter, vnd ir Wirt Her Hans von Liechtenstain hintz mir gehabt habent, vmb meiner vorgenanten Muemen vrawn Annen vaeterleich Erb, an dem andern tail, Derselben chrieg, vodrung vnd ansprach, wie so daz allez gehaizzen oder genant ist, Dez pin ich alles willichleich — gegangen —, Hinder die Erbern Herren Hern Rüdolfen von Walsse Haubtman in Steyr, Hinder Hern Otten von Stubenberg, Obristem schenkchen in Steyr, hinder Hern Haugen von Tybein vnd hinder Hern Otten von Ernuels, — Also waz die vir dar vmb zwischen vns erfindent vnd sprechent daz ich daz allez genczleich stet haben schol vnd wil an alle widerred . Wer aber, daz ich das yndert über für vnd nicht stet hiet, in welichen stukchen daz wer, So hiet ich alle meinew recht gen meim widertail vorauz verloren, Vnd wer dar zu dem Hochgeborn Fürsten meinem genedigen Herren dem Herczogen von Österreich verfallen vier Hvndert phunt wienner phenning vnd den obgenanten vir Spruchlewten, vir Hundert phunt wienner phenning, Vnd dez ze vrchund gib ich den brief versigelten mit meim obgenants Hertneidez von Pettaw anhangundem Jnsigl vnd durch pezzer sicherhait vnd güuter getzeugnüzz willen mit dez Erbern Friedreichs von Fridaw meins schaffer auch anhangundem Jnsigl, der daz durch meiner pet willen daran gehangen hat, ym vnd seinen Erben an schaden. Der brief ist geben nach Christes gepürd dreu czehen hundert iar, dar nach in dem Siben vnd Sibenczigistem iar dez nachsten Montags nach dem Sontag alz man singet misericordia domini.

Source Fulltext: OÖUB 9 (Wien 1906), S. 230-231